„ნაციონალური მოძრაობის“ წევრი ნიკა მელია ენერგეტიკის მინისტრის განცხადებას ეხმაურება, სადაც კალაძემ აღნიშნა, რომ „ნაციონალები“ ელექტროენერგიის გათიშვით გახარებულები იყვნენ.

„კალაძემ პრესკონფერენცია დაიწყო იმით რომ მსგავსი მასშტაბური ავარია 2010 წელს თურმე 3 -ჯერ მოხდა, ივლისში, აგვისტოში და სექტემბერშიო (რაც ტყუილია და სიტყვების თამაშია, ავარია შეიძლება იყო, მაგრამ მოსახლეობას არ უგრძვნია „მასშტაბური ავარია“)

ანუ აქაც წინა ხელისუფლებასთან ნიშნის მოგებას ეცადა და ‘საუბარი’ დაამთავრა იმით რომ ასეთი გახარებული ნაციონალური მოძრაობა ჯერ არ მინახავსო, მაგრამ არაუშავს წინ საინტერესო თვეები გველისო..

კახა, გახარებულები კი არ იყვნენ, არ დარჩა არც ერთი სკაბრეზული ზედსართავი სახელი, რომელიც გუშინ სამართლიანად არ მოგიძღვნეს.

ბოღმა და ღვარძლი მუშაობაში ხელს აშკარად გიშლის და დატოვე ‘გასახდელში’ , თორემ 2016 წლამდე მართლა საერთოდ ვერაფერს ვერ გააკეთებთ და 4 წელი მთლიანად დაკარგული გამოვა, რაც ძალიან ცუდია ქვეყნისთვის“, - წერს მელია „ფეისბუქზე“.

კახი კალაძის თქმით, ასეთი გახარებული „ნაციონალური მოძრაობა“, რაც მასშტაბური ავარიის დროს ვნახეთ, ბოლო ორი წელი არ უნახავს. მისი თქმით, ორი საათით ელექტროენერგიის გათიშვა არ ნიშნავს, რომ ოპოზიციის ლიდერებს ჩადენილ დანაშაულზე პასუხის გაცემა არ მოუწევთ.

ნინი კაციტაძე