საქართველოს საპარლამენტო უმცირესობის ლიდერმა დავით ბაქრაძემ პარლამენტში სიტყვით გამოსვლისას განაცხადა, რომ საქართველოს საზოგადოებას აინტერესებს როდის გაიზრდება პენსიები, იქნება თუ არა ბიუჯეტში გარღვევა და არა „მუდმივი ერთმანეთთან დაპირისპირება და ქილიკი“:

„ის რაც დღეს აინტერესებს მოსახლეობას, გახლავთ ის თუ როგორ იცხოვრებენ ისინი ხვალ. რა იქნება უმუშევრობა, რამდენი იქნება პენსია, როგორ განვითარდება ეკონომიკა, გაირღვევა თუ არა ბიუჯეტი, გაიზრდება თუ არა ფასები, მოიმატებს თუ არა კრიმინალი, ეს არის ის, რაც აინტერესებთ ადამიანებს და არა მუდმივი ერთმანეთთან დაპირისპირება და ქილიკი.

იმის შემდეგ რაც რუსეთმა გააკეთა უკრაინაში ბოლო თვეებში და განსაკუთრებით თვითმფრინავის ჩამოგდების შემდეგ, დღეს იქმენება ახალი წყალგამყოფი მსოფლიო ისტორიაში, თუ ამ წყალგამოყოფში ჩვენ მკაფიოდ არ დავიჭირეთ აშშ-სა და ევროპის მხარე, ეს ტალღა გადაგვიტანს რუსეთში და რუსული სახელმწიფოების კლუბში. ამიტომ, ნამდვილად არ გთხოვთ ვინმეს გინებას და ლანძღვას, მაგრამ როდესაც გამოდის შეერთებული შტატების პრეზიდენტი და იძახის, რომ რუსეთია პასუხისმგებელი თვითმფრინავის ჩამოგდებაზე, როდესაც ამას იძახის ევროკავშირი და ყველა ჩვენი ძირითადი მოკავშირე და ამ დროს საქართველოს პარლამენტის წევრები ამბობთ, რომ ამას ვერ გაიმეორებთ რადგან პასუხისმგებლობა გაქვთ, ეს ნიშნავს იმას, რომ ჩვენ ჩვენი პოლიტიკით ვშორდებით მთავარ მოკავშირეებს“, - განაცხადა დავით ბაქრაძემ.

ანო თორელი