დეპუტატმა გოგა ხაჩიძემ პარლამენტში სიტყვით გამოსვლისას ბიძინა ივანშვილს მადლობა გადაუხადაიმისათვის, რომ „ბატონმა ხადურმა 700 მილიონი სად დაკარგა კაცმა არ იცის“:

„მე ისიც ვისწავლე, რომ არ შეიძლება აქ ბატონი ბიძინას ციტატების ჩართვა, რადგან ამას პარლამენტში მყისიერად პროცედურული დემოკრატიის აღზევება მოჰყვება პარლამენტის თავმჯდომარისგან. მე პირდაპირ თქვენს ტონალობაში გადავალ და მინდა ძალიან დიდი მადლობა გადავუხადო ბატონ ბიძინას იმისთვის, რომ ასეთი პრემიერი დაგვინიშნა; დიდი მადლობა ბატონ ბიძინას იმისთვის, რომ ასეთი მთავრობა გვეყოლება; მადლობა ბატონ ბიძინას, რომ ასეთი პარლამენტი ვართ თქვენთან ერთად; დიდი მადლობა ბატონ ბიძინას, რომ ქალბატონი ეკა ბესელია მუზებზე მესაუბრება; მადლობა ბატონ ბიძინას, რომ ბატონმა ხადურმა 700 მილიონი სად დაკარგა კაცმა არ იცის და უკან ზის და ხითხითებს;

მადლობა ბატონ ბიძინას, რომ ქურდებს ვიღებთ და ვაცილებთ ქვეყნიდან; მადლობა ბატონ ბიძინას ყველაფრისთვის, დიდი მადლობა, რომ მზე ამოდის საერთოდ, ჩვენ ვვარსებობთ, ბატონი თავმჯდომარე მიკროფონს არ მირთავს, უდიდესი მადლობა, მაპატიეთ, თუ რამე შეგცოდეთ და ინდაური რომ მყავდეს, იმასაც გავათავისუფლებდი ახლა. ძალიან დიდი მადლობა, ღმერთმა ხელი მოგიმართოთ, ნამდვილად დაგჭირდებათ ეს.

აწი, ღმერთი თუ მოგიმართავთ ხელს, თორემ ისე ხართ რეალობას მოწყვეტილი, ადამიანისას ვეღარ გაიგებთ. მადლობა ბატონო ბიძინა, რომ მეხი არ დამეცა ამ სიტყვის წარმოთქმისას“, – განაცხადა ხაჩიძემ.