დავით ნარმანიას შტაბი მიმართვას ავრცელებს

პოლიტიკა - 20:28, 25 Jul, 2014

1993

თბილისის ახლადარჩეული მერის დავით ნარმანიას შტაბი მიმართვას ავრცელებს, და საარჩევნო სუბიექტებს დედაქალაქის სააგიტაციო მასალისგან გათავისუფლების აქციაში მონაწილეობისკენ მოუწოდებს.

,,საქართველოს საარჩევნო კოდექსის 46-ე მუხილის მერვე პუნქტის შესაბამისად, საარჩევნო სუბიექტი ვალდებულია, არჩევნების საბოლოო შედეგების ოფიციალურად გამოქვეყნებიდან 15 დღის ვადაში უზრუნველყოს სააგიტაციო მასალის ჩამოხსნა.

გარდა საარჩევნო კოდექსით დაკისრებული მოთხოვნისა, თვითმმართველობის არჩევნებში „ქართული ოცნების“ დამაჯერებელი გამარჯვება დედაქალაქის წინაშე უფრო მეტ ვალდებულებას გვანიჭებს. ჩვენთვის მნიშვნელოვანია, რომ თბილისი იყოს მოვლილი და სუფთა ქალაქი, ამიტომაც, ხვალ, 26 ივლისს კოალიცია „ქართული ოცნების“ შტაბი ვაწყობთ დასუფთავების აქციას, რომლის ფარგლებშიც დედაქალაქს საარჩევნო კამპანიისას განთავსებული სააგიტაციო მასალისგან გავწმენდთ.

აქციაში მონაწილეობას მიიღებენ დედაქალაქის არჩეული მერი დავით ნარმანია, საკრებულოს მაჟორიტარი დეპუტატები, კოალიცია „ქართული ოცნების“ საარჩევნო შტაბისა და ახალგაზრდული ორგანიზაციის წარმომადგენლები.

მივმართავთ თვითმმართველობის არჩევნებში მონაწილე ყველა საარჩევნო სუბიექტს, შეუერთდეს აქციას და თბილისი სააგიტაციო მასალისგან გავათავისუფლოთ.

აქცია დედაქალაქის მასშტაბით 11 საათზე დაიწყება“, - ნათქვამია დავით ნარმანიას მიმართვაში.