ოთარ დანელიამ პარლამენტში სამომავლო გეგმებზე ისაუბრა

პოლიტიკა - 19:21, 25 Jul, 2014

1415

საქართველოს პარლამენტში მინისტრთა კაბინეტის განახლებულ შემადგენლობასთან შეხვედრები მიმდინარეობს. დარგობრივი ეკონომიკისა და ეკონომიკური პოლიტიკის, აგრარულ საკითხთა, გარემოს დაცვისა და ბუნებრივი რესურსების, საფინანსო-საბიუჯეტო და რეგიონული პოლიტიკისა და თვითმმართველობის კომიტეტების გაერთიანებულ სხდომაზე ეკონომიკური მიმართულების მინისტრებმა სამომავლო გეგმებსა და პროგრამებზე ისაუბრეს.

როგორც სხდომაზე სოფლის მეურნეობის მინისტრმა, ოთარ დანელიამ აღნიშნა, საქართველოს სოფლის მეურნეობის განვითარება მთავრობის ერთ-ერთ ძირითად პრიორიტეტს წარმოადგენს, რადგან დარგში არსებული პოტენციალის მაქსიმალურად ათვისება და მიზნობრივი განვითარება ქვეყნის ეკონომიკისთვის სასიცოცხლოდ მნიშვნელოვანია. სწორედ ამიტომ, დადებითი შედეგის მიღწევის უპირველესი გარანტია იქნება მკაფიოდ განსაზღვრული აგრარული პოლიტიკა და სოფლის მეურნეობის სექტორში ფინანსური რესურსების მოზიდვის მნიშვნელოვანი ზრდა.

,,საქართველოს სოფლის მეურნეობის განვითარების სტრატეგიული ხედვა მდგრადი განვითარების პრინციპებზე დაყრდნობით, ისეთი გარემოს შექმნას ითვალისწინებს, რომელიც ხელს შეუწყობს სოფლის მეურნეობაში კონკურენტუნარიანობის ამაღლებას, მაღალხარისხიანი პროდუქციის წარმოების სტაბილურ ზრდას, სურსათის უვნებლობის და სასურსათო უსაფრთხოების უზრუნველყოფას და სოფლად სიღარიბის დაძლევას. 2013 წელს დაწყებული სისტემური ცვლილებების შედეგად, რაც არსებული საგარეო ბაზრების დივერსიფიკაციას და ახალი ბაზრების გახსნის (კერძოდ რუსეთის ბაზრის) ღონისძიებებს გულისხმობდა, მნიშვნელოვანი დადებითი ტენდენციები შეინიშნება აგროსასურსათო სექტორში საგარეო ვაჭრობის მიმართულებით. კერძოდ, 2013 წელს აგროსასურსათო პროდუქციის ექსპორტის ღირებულებამ შეადგინა 774,3 მლნ აშშ დოლარი, რაც 51.1%-ით მეტია წინა წლის ანალოგიურ მაჩვენებელთან შედარებით. 2014 წლის პირველი 6 თვის მონაცემებით, აგროსასურსათო პროდუქციის ექსპორტის ღირებულება შეადგენს 333,9 მლნ აშშ დოლარს, რაც 30%-ით მეტია წინა წლის ანალოგიურ მაჩვენებელთან შედარებით“, - განაცხადა ოთარ დანელიამ.

მინისტრმა სოფლის მეურნეობის განვითარების სტრატეგიის ძირითად მიმართულებებზეც ისაუბრა. ოთარ დანელიამ მიწის გამოყენების უფლებისა და განვითარების, ასევე, მიწის ბაზრის ეფექტიანად გამოყენების უზრუნველმყოფი საკანონმდებლო ბაზის ჩამოყალიბების მნიშვნელობაზე, სასურსათო უსაფრთხოებასა და სიღარიბის შემცირებაზე, სურსათის უვნებლობაზე, სოფლის მეურნეობის მოდერნიზაციისა და კონკურენტუნარიანობის ზრდის მნიშვნელობაზე, ფერმერთა კოოპერაციის გაძლიერებაზე, სასოფლო-სამეურნეო ნედლეულის,მომსახურებისა და ინფრასტრუქტურის გაუმჯობესებაზე ისაუბრა. ოთარ დანელიამ სასოფლო-სამეურნეო დაზღვევის ბაზრის განვითარების მნიშვნელობაზე, გარემოს დაცვასა და ბიომრავალფეროვნების უზრუნველყოფასა და ქართული პროდუქციის საექსპორტო პოტენციალზეც ისაუბრა.

მოხსენების შემდეგ ოთარ დანელიამ სასოფლო-სამეურნეო დარგების განვითარების კონკრეტულ გეგმებთან და სამომავლო ხედვებთან დაკავშირებითდამსწრე დეპუტატების მიერ დასმულ კითხვებს უპასუხა.

გაერთიანებულ სხდომაზე სოფლის მეურნეობის მინისტრთან ერთად დეპუტატების წინაშე ეკონომიკისა და მდგრადი განვითარების მინისტრი გიორგი კვირიკაშვილი, ენერგეტიკის მინისტრი კახა კალაძე, ფინანსთა მინისტრი ნოდარ ხადური, გარემოს დაცვისა და ბუნებრივი რესურსების მინისტრი ელგუჯა ხოკრიშვილი და რეგიონული განვითარებისა და ინფრასტრუქტურის მინისტრი დავით შავლიაშვილი წარსდგნენ.

დღესვე, საკომიტეტო მოსმენების შემდეგ, საპარლამენტო უმცირესობისა და საპარლამენტო უმრავლესობის წევრები მინისტრთა კაბინეტის განახლებულ შემადგენლობასთან შეხვედრებს გამართავენ.