საქართველოს პრეზიდენტი ნატო-ს საპარლამენტო ასამბლეის პრეზიდენტს ჰიუ ბეილის შეხვდა

პოლიტიკა - 18:43, 25 Jul, 2014

1420

საქართველოს პრეზიდენტი ნატო-ს საპარლამენტო ასამბლეის პრეზიდენტს ჰიუ ბეილის და მისი თანმხლები დელეგაციის წევრებს შეხვდა. შეხვედრის ერთ-ერთი მთავარი თემა ჩრდილოატლანტიკურ ალიანსში საქართველოს ინტეგრაციის პროცესის მიმდინარეობა იყო. საუბარი შეეხო უელსის ნატო-ს სამიტს, რომელიც სექტემბრის დამდეგს გაიმართება. ქართულმა მხარემ იმედი გამოთქვა, რომ აღნიშნულ სამიტზე დადებითად აისახება ის პროგრესი, რომელსაც ქვეყანამ ნატო-სთან დაახლოებისა და დემოკრატიული განვითარების თვალსაზრისით მიაღწია. საქართველოს პრეზიდენტმა კიდევ ერთხელ ხაზგასმით აღნიშნა, რომ ქართული სახელმწიფოს ერთ-ერთი უმთავრესი პრიორიტეტი სწორედ ნატო-სა და ევროპულ სტრუქტურებში ინტეგრაციაა. გიორგი მარგველაშვილის თქმით, აუცილებელია, რომ კომუნიკე, რომელსაც სამიტზე მიიღებენ, ორიენტირებული იყოს არა ნატო-ს პარტნიორობაზე, არამედ წევრობაზე და შეიცავდეს ძლიერ პოლიტიკურ მესიჯებს.

როგორც ჰიუ ბეილიმ აღნიშნა, ნატო-ს საპარლამენტო ასამბლეა მხარს უჭერს საქართველოსთვის მაპ-ის მინიჭების საკითხს.

„საქართველოს პრეზიდენტმა შეგვახსენა, რომ საქართველო არის ნატო-ს ყველაზე ძლიერი, ეფექტიანი და ერთგული პარტნიორია და რომ საქართველოს სურს მისი წევრობის სამოქმედო გეგმის [MAP] მიღება. ჩვენმა ასამბლეამ, რომელიც შედგება წევრ-სახელმწიფოთა საპარლამენტო წარმომადგენლებისგან, მხარი დაუჭირა საქართველოსთვის მაპ-ის მინიჭების საკითხს. ჩვენ ერთად განვიხილეთ ის შედეგი, რომლის დანახვაც საქართველოს უელსში, ნატოს სამიტზე სურს. ეს კი, ხაზგასმით მიუთითებს იმას, რომ საქართველო დგას ალიანსში სრული გაწევრების გზაზე, ისევე, როგორც ევროკავშირთან“, - განაცხადა ჰიუ ბეილიმ.

მხარეებმა ასევე რეგიონალური უსაფრთხოების საკითხები განიხილეს.