ხელისუფლება ,,სამდურაკის“ პრინციპით პასუხობდა ნაციონალებს

ხელისუფლება ,,სამდურაკის“ პრინციპით პასუხობდა ნაციონალებს - კახიშვილის შეფასება

პოლიტიკა - 18:34, 25 Jul, 2014

2419

ექსპერტი კახი კახიშვილი უმცირესობის წევრებისა და მინისტრობის კანდიდატების დღევანდელ შეხვედრას აფასებს. როგორც „ნიუპოსტთან“ საუბარში კახიშვილმა განაცხადა, კითხვა-პასუხის დროს გამოყენებული იყო „სამდურაკის“ პრინციპი.

„ვფიქრობ ის რისთვისაც, შეინარჩუნა „ქართულმა ოცნებამ“ „ნაციონალური მოძრაობა“ ერთადერთი ოპოზიციის რანგში და ის პრინციპი, რომ მუდმივად ყოფილიყო „სამდურაკის“ სტრატეგიით პასუხების გაცემა, დღესაც მოქმედებდა. რეალურად, ვნახეთ რომ ყველა კითხვაზე გამოყენებული იყო პრინციპი „სამდურაკ“. მე საერთოდ ვფიქრობ, რომ როდესაც კეთდება პოლიტიკური განცხადებები სექსუალურ ძალმომრეობით მოქმედებებზე, წამებაზე, კორუფციაზე, ამ ყველაფერს სჭირდება სამართლებრივი მოქმედებები. 2 წელია უამრავ კორუფციულ და წამების ფაქტებზე გვესმის მმართველი გუნდისგან საუბარი. საჭიროა ასეთი საქმეები წარიმართოს სასამართლოში. მუდმივად პოლიტიკური განცხადებების კეთება და სასამართლოებში გამამრთლებელი განაჩენების სტრატეგია დიდხანს ვერ გაამართლებს“, - აცხადებს კახიშვილი.

მისი თქმით, თითოეულმა მინისტრმა „ნაციონალური მოძრაობის“ შეკითხვებზე ვრცლად გასცეს პასუხები, თუმცა ექსპერტი მიიჩნევს, რომ მჭერმეტყველებით მათი საქმიანობა ვერ შეფასდება.

„მე მივეკუთვნები იმ ადამიანების კატეგორიას, რომლებიც ადამიანებს არ აფასებენ მჭერმეტყველებით. ბევრი ეგეთი ადამიანი ვიცი, რომელმაც საქმეში არ ივარგა. დღეს ყველაზე მეტ კითხვაზე პასუხის გაცემა მინისტრ ჭიკაიძეს მოუწია. შეიძლება ჭიაკიძის მჭერმეტყველება ვინმესთვის არასასურველი იყოს, მაგრამ მთავარია მინისტრმა უზრუნველყოს შინაგან საქმეთა სამინისტროზე დაკისრებული ამოცანების შესრულება. შეძლებს თუ არა ამას ჭიკაიძე, ეს დროის ამბავია. მე ვისურვებდი, რომ მომავალში პარლამენტი უფრო საქმიანი იყოს, ვიდრე პოლიტიკური ბრალდებებით - დაკავებული“, - განაცხადა კახიშვილმა.

პარლამენტში დღეს მინისტრობის კანდიდატების და უმცირესობის წარმომადგენლების შეხვედრა გამართა. „ნაციონალური მოძრაობის“ წევრებმა ყველაზე მეტი კითხვა შს მინისტრს ალექსანდრე ჭიკაიძეს დაუსვეს. კითხვები ასევე შეეხებოდა ქვეყანაში არსებულ სოციალურ და ეკონომიკურ მდგომარეობს.

ნინო დათაშვილი