საპარლამენტო უმცირესობის წევრმა გოკა გაბაშვილმა პრემიერმინისტრ ირაკლი ღარიბაშვილს კანონიერი ქურდის „რემენას“ ადგილსამყოფელის შესახებ ინფორმაცია სთხოვა. გაბაშვილმა აღნიშნა, რომ ირაკლი ღარიბაშვილს აღნიშნულ საკითხთან დაკავშირებით კითხვებზე პასუხები არ გააჩნია და ყოველივეზე ზოგადად უწევს საუბარი:

„ბატონო ირაკლი, თუ კომენტარს არ გააკეთებთ, მაშინ ნუ გააკეთებთ, იმიტომ, რომ მე არ დამისვამს ზოგადი კითხვა და ქურდულ სამყაროსთან ბრძოლას თქვენ ჩვენ ნამდვილად ვერ გვასწავლით, მე კონკრეტულად გკითხეთ, კანონიერი ქურდის დეპორტაცია მოხდა საქართველოში, რაიმე ინფორმაციას ხომ არ ფლობთ, როგორ გააპარეთ, ან ვინ გააპარა კანონიერი ქურდი? ან აქ ხომ არ არის? თქვენ კონკრეტული პასუხი არ გაქვთ, იძულებული ბრძალნდებით ზოგადად ისაუბროთ საქართველოს საკონსულოს ინფორმაციაზე და უკრაინის მხარის ინფრომაციაზე. უსაფუძვლო ჩვენი ბრალდება არ არის და ბრალდებაც არ არის, თქვენ ეტყობა ბრალდება და ინფორმაციის მოთხოვნა ერთმანეთში გეშლებათ, მე ვიკითხე და მოვითხოვე ინფორმაცია სად არის კაცი?“, - განაცხადა გაბაშვილმა.

დეპუტატის კითხვას პრემიერმა მსგავსი პასუხი გასცა:

„არ ვიცი, თქვენს რიგებში არ ვიცი, შესაძლოა მანდ იმალება“, - უპასუხა პრემიერმა.

ანანო კვაჭანტირაძე