„თავისუფლებისა და დემოკრატიის განვითარების ინსტიტუტის“ აღმასრულებელი დირექტორი თეა თუთბერიძე პარლამენტში ჩიორა თაქთარიშვილსა და ეკა ბესელიას შორის დაპირისპირებას „ფეისბუქზე“ ეხმაურება.

„ეკა ბესელია, უკაცრავად საზოგადოებასთან, მაგრამ შენ რომ ჩიორა თაქთაქიშვილზე კი არა, საერთოდ ვინმეზე იტყვი ფსიქიატრიულშია წასაყვანიო, რატომ მიწა არ გასკდება და ცა არ ჩამოიქცევა!

ფსიქიატრიულში წასაყვანიც ხარ და აღარც არავინ მიგიღებს იმ ფსიქიატრიულში, რადგან ფსიქიატრიული თავზედაც რომ დაგადგან, შენ მაინც ვერაფერი გიშველის აწინ. შენ და შენისთანა კრიმინალური მენტალიტეტის მატარებელ არსებებს, მართლა რომ რაღაც ჰგონიათ დღეს თავი, აი ეგ არის სასაცილო, მაგრამ ამ ქვეყნისთვის კი ტრაგედიაა შენ რომ დღეს გქვია ამ ქვეყნის დეპუტატი და ადამიანის უფლებათა კომიტეტის თავმჯდომარე“, - წერს თუთბერიძე.

გუშინ, ადამიანის უფლებათა დაცვის კომიტეტის სხდომაზე ეკა ბესელიასა და ჩიორა თაქთაქიშვილს შორის სიტყვიერი დაპირისპირება მოხდა.

„მთელი „ნაციონალური მოძრაობა „ კრიმინალური ბანდა“, - განაცხადა ბესელიამ. აღნიშნულის შემდეგ თაქთაქიშვილმა პროტესტის ნიშნად კომიტეტის სხდომა დატოვა.

"ფსიქიატრიულშია წასაყვანი ეს ქალბატონი. ფსიქიატრიულში უნდა წაიყვანო და იქ უნდა გასინჯო ასეთი ხალხი", - განაცხადა ბესელიამ მას შემდეგ რაც თაქთაქიშვილი სხდომიდან გავიდა.

ნინი კაციტაძე