ეროსი კიწმარიშვილის ძმა ზურაბ კიწმარიშვილი მთავარი პროკურატურიდან რამდენიმე წუთის წინ გამოვიდა. კიწმარიშვილი პროკურორებს და გამომძიებლებს საკუთარი ინიციატივით შეხვდა. ის საერთო ჯამში მიმდინარე გამოძიებას ამ დროისთვის დადებითად აფასებს.

კიწმარიშვილის განცხადებით, ბალისტიკური ექპერტიზა უკვე ჩატარებულია, თუმცა რაც შეეხება შედეგებს, ამაზე საუბარი ჯერჯერობით არ შეუძლია.

როგორც ჟურნალისტებთან საუბრისას კიწმარიშვილმა აღნიშნა, მან მიიღო ინფორმაცია გამოძიების მიმდინარეობის შესახებ. მისივე თქმით, გარკვეული ტიპის ინფორმაცია გამოძიებას თავადაც მიაწოდა. კიწმარიშვილმა ასევე გადაამოწმა მედიაში გავრცელებული ინფორმაცია, იმის შესახებ, რომ საქართველოში შესაძლოა უცხოელი ექსპერტები ჩამოვიდნენ, რომლებიც საქმის ძიებაში ჩაერთვებიან. კიწმარიშვილის თქმით, აღნიშნულ ინფორმაციას გამოძიება არ ადასტურებს.

„პროკურატურამ, რომელიც იძიებს ეროსი კიწმარიშვილი გარდაცვალების საქმეს უცხოეთიდან მოიწვია ექსპერტ-კრიმინალისტ პრაქტიკოსები და ამის შესახებ ოჯახის წევრების საქმის კურსში იყვნენ, მაშინვე საჭიროდ ჩავთვალე, რომ ეს ინფორმაცია გადამემოწმებინა, ვიყავი პროკურორთან და ამის შესახებ კითხვები დავუსვი. შემიძლია გითხრათ, რომ მათი მხრიდან ასეთი ჩართულობის შესახებ თხოვნა არ ყოფლია. ბუნებრივია არც ჩვენ, ოჯახს არ მიგვიღია ასეთი ტიპის გადაწყვეტილება, რომ ვინმე მოგვეწვია და ჩართულიყო გამოძიების პროცესში“,- განაცხადა კიწმარიშვილმა.

რაც შეეხება ბალისტიკურ ექსპერტიზას, ის ჩაატარეს ქართველმა ექსპერტებმა, თუმცა ოჯახი წინააღმდეგი არ არის, რომ ამ საქმეში უცხოელი ექსპერტები ჩაერთონ. რაც შეეხება ექსპერტიზის პასუხს და შედეგებს შესაძლოა ის უახლოეს ხანში გახდეს ცნობილი, თუმცა კიწმრიშვილი ამბობს, რომ ამის შესახებ საუბარი მას არ შეუძლია.

„ექსპერტიზის პასუხი შეიძლება ახლაც არის, შეიძლება ხვალ იყოს, შეიძლება სამ დღეში, მაგრამ იქ რა წერია, ჩვენ ამას ამ ეტაპზე ვერ გავიგებთ. ეს დეტალები აქვს გამოძიებას და გამოძიება ჩვენ არ გვაძლევს უფლებას რომ მათი გამოძიების პროცესში რაიმე ინფორმაცია გამოვიტანოთ“,- აღნიშნა კიწმარიშვილმა ჟურნალსიტებთან საუბრისას.

ნინა გოლოშვილი