მაია ფანჯიკიძე ბრიტანელ პარლამენტარებს შეხვდა

პოლიტიკა - 19:04, 24 Jul, 2014

1092

საგარეო საქმეთა მინისტრმა მაია ფანჯიკიძემ საქართველოში ვიზიტით მყოფ ბრიტანეთის პარლამენტის თემთა და ლორდთა პალატის წევრებთან შეხვედრა გამართა. ბრიტანელი პარლამენტარების დელეგაციას საქართველო - ბრიტანეთის საპარლამენტო ჯგუფის ხელძღვანელი მარკ რეკლეს თავმჯდომარეობდა.

შეხვედრისას საუბარი შეეხო ორმხრივი ურთიერთობის საკითხებს. ბრიტანული მხარე დაინტერესდა საქართველოს ევროპული და ევროატლანტიკური ინტეგრაციის პროცესით, რუსეთთან ურთიერთობების ფორმატით, აფხაზეთისა და სამხრეთ ოსეთის პროპლემატიკით და ანტიდისკრამინაციულ კანონთან დაკავშირებული შეფასებებით, რაზეც მინისტრმა მათ ამომწურავი ინფორმაცია მიაწოდა.

მხარეებმა ასევე განიხილეს უკრაინის კრიზის გარშემო განვითარებული მოვლენები და რუსეთთან ურთიერთობებში არსებული გამოწვევები.

ბრიტანულმა მხარემ ხაზი გაუსვა ევროპულ და ევროატლანტიკურ სტრუქტურებში გაწევრიანების გზაზე საქართველოს მიერ მიღწეულ პროგრესს და მადლობა გადაუხადა ქართულ მხარეს გულთბილი მასპინძლობისთვის.

„არსებობს აზრთა სხვადასხაობა საქართველოს ევროატლანტიკური ინტეგრაციის ტემპებსა და გზებზე, თუმცა ყველა ვთანხმდებით იმაში, რომ დემოკრატიულ ქვეყანას საგარეო კურსთან დაკავშირებით უნდა შეეძლოს გადაწყვეტილების დამოუკიდებლად მიღება და არანაირ გარე ძალას არ უნდა ჰქონდეს შესაძლებლობა ქვეყნის დემოკრატიულ არჩევანს ვეტო დაადოს“, - განაცხადა შეხვედრის შემდეგ მარკ რეკლესმა.

როგორც შეხვედრის კომენტირებისას საგარეო საქმეთა მინისტრმა განაცხადა,-„ბრიტანელ პარლამენტარებთან შეხვედრა ძალიან მნიშვნელოვანია, რადგან ნატოს მომავალი სამიტი უელსში ტარდება და ბრიტანეთი ძალიან დიდ როლს თამაშობს გადაწყვეტილების მიღებაში, ამიტომ კიდევ ერთხელ დავაფიქსირეთ მათ წინაშე ჩვენი პოზიცია ევროკავშირსა და ნატოსთან მიმართებაში“-აღნიშნა მაია ფანჯიკიძემ.

აღსანიშნავია, რომ ბრიტანეთის პარლამენტის დელეგაციის წევრები საქართველოში ოთხდღიანი ვიზიტის ფარგლებში დაესწრნენ ქალაქ ბათუმში გამართულ კონფერენციას „საქართველოს შემდგომი ნაბიჯები ევროკავშირისკენ: ვიშეგრადის ჯგუფის ქვეყნების საპარლამენტო გამოცდილების გაზიარება“, მათ ასევე შეხვედრები გამართეს საქართველოს პარლამენტის თავმჯდომარესთან, საგარეო ურთიერთობების კომიტეტის თავმჯდომარესთან, ოპოზიციის წარმომადგენლებთან, თავდაცვის მინისტრთან და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრთან.

ნინა შადური