ადამიანის უფლებთა დაცვისა და სამოქალაქო ინტეგრაციის კომიტეტის თავმჯდომარე ეკა ბესელია აცხადებს, რომ ჩიორა თაქთაქიშვილი დეპუტატის ქცევის სტანდარტებს არღვევს.

"ჩვენ დავაყენებთ დისციპლინურ საკითხს ამ ქცევასთან დაკავშირებით, რომლითაც გამოირჩევა ქალბატონი თაქთაქიშვილი, რომელიც ზოგჯერ უკონტროლოა და დღეს ვნახეთ მისი უკონტროლობის კიდევ ერთი პიკი. ის უკვე ცდება დეპუტატის და კომიტეტის თავმჯდომარის მოადგილის ქცევის სტანდარტებს და მგონია, რომ ცოტა ფსიქიატრების დახმარებაც სჭირდება",- განაცხადა ბესელიამ.

დღეს, პარლამენტში ადამიანის უფლებათა დაცვის კომიტეტის სხდომაზე ეკა ბესელიასა და ჩიორა თაქთაქიშვილს შორის სიტყვიერი დაპირისპირება მოხდა.

"თქვენ ბრძანდებით ქურდების ადვოკატი და პიროვნება, რომელიც კრიმინალურ სამყაროს წარმოადგენს და იცავს კრიმინალურ პროკურატურას," – მიმართა ჩიორა თაქთაქიშვილმა ეკა ბესელიას.

ბესელიამ თაქთაქიშვილს თავხედი, მწამებელთა წარმომადგენელი და მკვლელების გუნდის თანამოაზრე უწოდა.

„მთელი „ნაციონალური მოძრაობა „კრიმინალური ბანდა“, - განაცხადა ბესელიამ. აღნიშნულის შემდეგ თაქთაქიშვილმა პროტესტის ნიშნად კომიტეტის სხდომა დატოვა, დარბაზიდან გასვამდე კი ეკა ბესელიამ მიკროფონი გამოურთო.

"ფსიქიატრიულშია წასაყვანი ეს ქალბატონი. ფსიქიატრიულში უნდა წაიყვანო და იქ უნდა გაასინჯო ასეთი ხალხი", - განაცხადა ბესელიამ მას შემდეგ რაც თაქთაქიშვილი სხდომიდან გავიდა.

ნინა შადური