უზენაესი სასამარლოს თავმჯდომარე პრემიერ-მინისტრს პასუხობს. კოტე კუბლაშვილის თქმით, მას არავის შეხსენება არ სჭირდება იმისთვის, თუ როგორ დაიცვას მოსამართლეები.

„ბევრი ესეთი ავყია ადამიანი დადის სასამართლოზე და თავის განცხადებებს აკეთებს. ეს მოსამართლეებისთვის უცხო არ არის და ისინი ძალიან კარგად უმკლავდებიან რიგითი მოქალაქეების მხრიდან მსგავს შეფასებებს. მათ აქვთ უფლებამოსილება, რომ როდესაც ადამიანი სასამართლო დარბაზში ადგება და რაღაცას იტყვის, დააჯარიმოს. ასეთ დროს არ სჭირდებათ მოსამართლეებს დაცვა, როდესაც თვითონაც შეუძლიათ დაიცვან თავი. მათ სჭირდებათ დაცვა, რომ არ გაგრძელდეს ხელისუფლების უმაღლესი წარმომადგენლების მხრიდან მოსამართლეებზე ზეწოლა“, - განაცხადა კუბლაშილმა.

უზენაესი სასამართლოს თავმჯდომარე მოუწოდებს პრემიერს, რომ მოახდინოს რეაგირება, როდესაც მინისტრები კონკრეტული მოსამართლეების გადაწყვეტილებებს პირდაპირ ეთერში აკრიტიკებენ.

"მეც ძალიან გაოცებული ირაკლი ღარიბაშვილის პასიურობით, როდესაც მისი მთავრობის ერთ-ერთი წევრი გამოდის და მოსამართლეების მიმართ პირდაპირი ეთერით ზეწოლას ახორციელებს. რატომ არ გამოდის და რატომ არ ამბობს, რომ ეს არის პირდაპირი ზეწოლა მოსამართლეებზე“, - აცხადებს კუბლაშვილი.

პრემიერმა კოტე კუბლაშვილს იმის გამო უსაყვედურა, რომ უკრანის პრეზიდენტის მრჩევლის იური ლუცენკოს მხრიდან ერთ-ერთი მოსამართლის მიმართ გამოთქმულ რეპლიკაზე რეაგირება არ მოახდინა.

ნინო დათაშვილი