თბილისის მერის დავით ნარმანიას მიერ გავრცელებულ განცხადებას თბილისის მერიის სოციალური სამსახურის უფროსი მამუკა ქაცარავა პასუხობს. ქაცარავას აზრით, შექმნილი ვითარება გაუგებრობაა:

„შეიქმნა გაუგებრობა ქალაქის მთავრობის წევრების უფლებამოსილების შემდგომ გაგრძელებასთან დაკავშირებით. მე არ გამოვრიცხავ, რომ ამ გაუგებრობიდან გამომდინარე იყო ერთეული შემთხვევები მოქალაქეებისადმი არასწორ მიდგომასა და არასწორ გადამისამართებასთან დაკავშირებით“, - განაცხადა მამუკა ქაცარავამ.

შეგახსენებთ, რომ დავით ნარმანიამ მერიის ყველა სამსახურს მოუწოდა, „ნუ მოახდენენ საქმიანობის პარალიზებას და იმუშაონ ჩვეულ რეჟიმში“.

„აღნიშნული ქმედება, სავარაუდოდ, განპირობებულია პასუხისმგებლობის თავიდან აცილების მოტივით. მერიის სამსახურების ხელოვნური პარალიზებით, პირველ რიგში, ზარალდებიან თბილისელები, რომლებიც დედაქალაქის თვითმმართველობის სტრუქტურებს კონკრეტული საკითხების გადაწყვეტის თხოვნით მიმართავენ.

ადგილობრივი თვითმმართველობის კოდექსისა და საარჩევნო კოდექსის თანახმად, ქალაქ თბილისის ახლადარჩეულ მერს თავისი მოვალეობების შესრულების უფლება მხოლოდ მისი უფლებამოსილების ცნობის შემდეგ უჩნდება. საქართველოს კანონმდებლობით, ახალი მერის უფლებამოსილების ცნობამდე, არსებული ვიცე-მერები, თბილისის მთავრობა და მთავრობის შესაბამისი სტრუქტურული ერთეულები ვალდებული არიან, ჩვეულ რეჟიმში განაგრძონ მუშაობა და კეთილსინდისიერად შეასრულონ კანონმდებლობით მათზე დაკისრებული მოვალეობები. მოვუწოდებთ მერიის ყველა სამსახურს, არ დაარღვიონ კანონი, ნუ მოახდენენ საქმიანობის პარალიზებას, იმუშაონ ჩვეულ რეჟიმში და ემსახურონ დედაქალაქისა და მისი მაცხოვრებლების ინტერესებს. წინააღმდეგ შემთხვევაში, მათი ამგვარი ქმედება შეფასდება პასუხისმგებლობისგან თავის არიდებისა და საბოტაჟის მცდელობად“, - ნათქვამია განცხადებაში.

ანო თორელი