საქართველოს პრეზიდენტის გიორგი მარგველაშვილი მიიჩნევს, რომ პოლიტიკური თვალსაზრისით არასწორია როდესაც ხელისუფლება მორატორიუმს აცხადებს და ამ მორატორიუმის დროს ოპოზიციის ლიდერი აკავებს.

როგორც ტელეკომპანია „კავკასიის“ ეთერში სტუმრობისას მარგველაშვილმა განაცხადა, ამის მიუხედავად ის გიგი უგულავას პოლიტიკურ პატიმრად არ აღიქვამს.

“იმის განცდა არ მაქვს, რომ სასამართლოს არ უნდა ვენდო, რადგან “ნაციონალური მოძრაობა” თვლის, რომ უგულავა პოლიტიკური დევნის ქვეშ არის. რა თქმა უნდა, ჩემთვის არ იყო სასიამოვნო, რომ მაინცდამაინც მორატორიუმის მომენტში დააკავეს გიგი უგულავა. არა იმიტომ, რომ მე ამას პოლიტიკურ დევნად მივიჩნევ, არამედ პოლიტიკური თვალსაზრისით არის არასწორი გამოაცხადო მორატორიუმი და შემდეგ დააპატიმრო. მორატიუმი, ეს არის რაღაცა დამატებითი ქმედება, რომლის ვალდებულებაც ხელისუფლებამ აიღო საკუთარ თავზე არჩევნების დროს. რა თქმა უნდა, ეს ჩემთვის, ჩემი აზრით, იყო შეუსაბამობა იმ განცხადებასთან, რომელიც მორატორიუმით განხორციელდა, მაგრამ რომ ვთქვა, რომ აქედან გამომდინარე, გიგი უგულავას პოლიტპატიმრად მივიჩნევ, მე ასეთი შეგრძნება არ მაქვს", - განაცხადა გიორგი მარგველაშვილმა.

ნინი კაციტაძე