საპარლამენტო უმცირესობის შეხვედრამ ნოდარ ხადურთან ხმაურის ფონზე ჩაიარა. დეპუტატები „ნაციონალური მოძრაობიდან“ ფინანსთა მინისტრს გასულ წელს სამინისტროებში გაცემული პრემიების შესახებ ახსნა-განმარტებას სთხოვენ. უმცირესობის ერთ-ერთმა წარმომადგენელმა ირმა ნადირაშვილმა ნოდარ ხადურს ბრალი ტყუილში დასდო.

"მე თქვენს მიმართ სიტყვა უზნეობა არ მიხმარია, მაგრამ შევცდი, რადგან თქვენ უკვე იტყუებით. 2013 წლის განმავლობაში "გაერთიანებული წყალმომარაგების კომპანიის" დირექტორს აღებული აქვს 130 ათასი ლარის ფარგლებში პრემია, აქედან ერთჯერადად დეკემბრის თვეში - 33 ათასი ლარი. მის მოადგილეებს კი 90 ათასი ლარის ფარგლებში, აქედან დეკემბრის თვეში 5 კაცზე წყალმომარაგების კომპანიაში გაწერილია 600 ათასი ლარი პრემია“, -განაცხადა ირმა ნადირაშვილი

მინისტრმა საპასუხოდ აღნიშნა, რომ წინა მთავრობის ფინანასთა მინისტრი თვეში 27 ათას ლარს იღებდა, დღევანდელი კი 5 ათას ლარს იღებს. მინისტრის თქმით, პრემიები 11 მილიონი ლარითაა შემცირებული.

"როცა თქვენი ოჯახის წევრი საჯარო სამსახურში 10 ათას ლარიან პრემიას იღებდა, ეს უზნეობა არ იყო?!", - მიმართა ხადურმა ნადირაშვილს.

ნინა შადური