სამთავრობო გუნდში განხორციელებულ ცვლილებებს კულტურისა და ძეგლთა დაცვის ყოფილი მინისტრი გურამ ოდიშარია ეხმაურება.

მისი თქმით, ის საქმიანობას სხვა ორგანიზაციაში გააგრძელებს.

„ვერ ვიტყოდი, რომ ეს არის გათავისუფლება. ჩემს საქმიანობას ერთ–ერთ ორგანიზაციაში გავაგრძელებ, რის შესახებაც მალე ყველასთვის გახდება ცნობილი. დღეიდან მინისტრის მოვალეობის შემსრულებელი ალექსანდრე მარგიშვილია. ვინ დაიკავებს ჩემს ადგილს, როგორც ბატონმა პრემიერმა თქვა, ერთ ან ორ დღეში თავად განაცხადებს“,- განაცხადა ოდიშარიამ.

მისი თქმით, პრემიერი გადაწყვეტილება მისთვის მოულოდნელი არ იყო. როგორც გურამ ოდიშარია აცხადებს, მისი გადაყენების თაობაზე საუბარი მიმდინარეობდა და „ორივე მხარის მხრიდან ამაზე თანხმობა იყო“.

„დიდი ხანია ამაზე საუბარი მიმდინარეობდა და ორმხრივი თანხმობა იყო. 2 წელი არ შეიძლება კაცმა იმუშაო ერთსა და იმავე ადგილას. ეს ჩვეულებრივი მოვლენაა. მე სამინისტროს და ახალი ხელმძღვანელის მეგობარი ვარ. გავუზიარებ ჩემს მიერ დაგროვილ გამოცდილებას და იდეებს, რომელიც გამაჩნია“, - განაცხადა ოდიშარიამ.

ნინი კაციტაძე