ექსპერტი ლევან ალაფიშვილი მინისტრთა კაბინეტში განხორციელებულ ცვლილებებს ეხმაურება. „ნიუპოსტთან“ საუბარში ლევან ალაფიშვილი ამბობს, რომ ირაკლი ღარიბაშვილმა მთავრობაში საკადრო ცვლილებისთვის კარგი დრო დაამთხვია. რაც შეეხება პროცედურებს, ალაფიშვილის განმარტებით პრემიერ-მინისტრს ამ შემთხვევაში ცვლილებების განსახორციელებლად პარლამენტის დასტური სჭირდება. კერძოდ, კონსტიტუციის მიხედვით, საკანონმდებლო ორგანომ უნდა დაამტკიცოს სამთავრობო გუნდი, პრემიერის გამოკლებით. ამ შემთხვევაში პრემირ-მინისტრს ახალი ნდობის მანდატი არ სჭირდება.

„რეალურად ახალი ნდობის მოპოვების მექანიზმი არის მაშინ, როდესაც არჩევნების შემდეგ ახალი მთავრობა იქმნება ან პრემიერი გადადგება და ახალი პრემიერი აყალიბებს გუნდს. თუმცა როდესაც არსებული პრემიერი ცვლის გუნდს, მას, ამ შემთხვევაში სჭირდება პარლამენტის დასტური. საკანონმდებლო ორგანომ უნდა დაამტკიცოს მხოლოდ მთავრობის შემადგენლობა. პრემიერ-მინისტრისთვის ახალი ნდობის მანდატის მოპოვება საჭირო არ არის. რაც შეეხება გადაწყვეტილებას, ეს პოლიტიკურად გასაგები იყო. წინა კვირას გავაკეთე პროგნოზი, რომ მთავრობის ცვლილებისთვის ყველაზე კარგი დრო ეხლა იყო. ეს იყო ლოგიკური და მოსალოდნელი. კიდევ უფრო მნიშვნელოვანი იქნება შიდა გადაადგილებები კოალიციური თვალსაზრისით. მნიშვნელოვანი ფიგურები დარჩნენ მთავრობის შემადგენლობაში, მაგრამ მნიშვნელოვანი იქნება სად გადანაწილდებიან ისინი. არ ვიცით თეა წულუკიანი, ალექსი პეტრიაშვილი, მაია ფანჯიკიძის და სხვების სამომავლო ადგილები. შესაძლოა მოხდეს მათი გადაადგილებაც, დაველოდოთ“, - განაცხადა ალაფიშვილმა.

მინისტრთა კაბინეტში საკადრო ცვლილებები განხორციელდა. ცვლილება შეეხო შვიდ სამინისტროს. ესენია: სოფლის მეურნეობის სამინისტრო, სასჯელაღსრლებისა და პრობაციის სამინისტრო, დევნილთა სამინისტრო, გარემოს დაცვისა და ბუნებრივი რესურესბის სამინისტრო, ინფრასტრუქტურის სამინისტრო, კულუტრის სამინისტრო და დიასპორის საკითხებში სახელმწიფო მინისტრის აპარატი. თუმცა როგორც პრემიერმა განმარტა სოზარ სუბარი დევნილთა და განსახლების მინისტრად გააგრძელებს მუშაობას, ხოლო ელგუჯა ხოკრიშვილი გარემს დაცვისა და ბუნებრივი რესურსების დაცვის მინისტრად.

ნინო დათაშვილი