ჯაბა სამუშიასა და ალეკო ელისაშვილს შორის საკრებულოში დაპირისპირება მოხდა

პოლიტიკა - 16:03, 19 Jul, 2014

2544

ჯაბა სამუშიასა და ალეკო ელისაშვილს შორის სიტყვიერი დაპირისპირება მოხდა. დეპუტატებს შორის ინიდენტი თბილისის საკრებულოში პრემიებთან დაკავშირებული საკითხის რეგლამენტში შეტანას მოჰყვა.

პრემიების გაცემაზე უარის თქმის საკითხთან დაკავშირებით საკრებულოს სხდომაზე ინიციატივით რესპუბლიკელები შევიდნენ. რესპუბლიკელებმა მოითხოვეს, რომ საკრებულოში პრემიების გაცემაზე უარის თქმის საკითხი კენჭისყრაზე დამდგარიყო, რასაც რამდენიმე ფრაქცია დაეთანხმა.

საკითხის რეგლამენტში შეტანას სხდომაზე კამათი მოჰყვა. ფრაქცია "ქართული ოცნების" ერთ-ერთმა ლიდერმა ჯაბა სამუშიამ განაცხადა, საკითხი შესწავლა დროს საჭიროებს, რადგან პრემიების გაცემა მხოლოდ საკრებულოს თანამდებობების პირებისა არ ეხებათ, როგორც სამუშიამ სდომაზე განამრტა, საკრებულოს უნდა მიეღო ისეთი ფორმულირება, რომელიც მომავალში დავას არ გამოიწვევდა.

ჯაბა სამუშიას განცხადებას დამოუკიდებელი დეპუტატის ალეკო ელისაშვილის რეპლიკა მოჰყვა, ელისაშვილის თქმით, ჯაბა სამუშიას პრემიების საკითხი აწუხებს, რადგან მას ყველაზე დიდი პრემია აქვს აღებული, ,,ცოტა დაირცხვინეთ მაინც და ისე ილაპარაკეთ“, - მიმართა ელისაშვილმა სამუშიას.

ჯაბა სამუშიამ კოლეგას ამ განცხადების გამო ,,უზრდელი“ უწოდა, რის შემდეგაც ელისაშვილი სკამიდან წამოდგა და სამუშიასკენ გაიწია. სიტუაციის განმუხტვა დავით ზურაბიშვილმა სცადა. ,,ჩუმად მაინც იჯექი და სხვას აცალე ლაპარაკი“, - მიმართა ელისაშვილმა სამუშიას.

აღნიშნულ საკითხზე ჟურნალისტებთან კომენტარი გააკეთა ფრაქცია ,,ნაციონალური მოძრაობის“ წევრმა ირაკლი აბესაძემ, რომელმაც აღნიშნა, რომ უმრავლესობა არ აპირებს სამართლებრივად დაადასტუროს განცხადება პრემიებზე უარის თქმის შესახებ. დეპუტატის თქმით, თუ საკითხი რეგლამენტში არ იქნება შეტანილი, საკრებულოს უმრავლესობა რეალურად პრემიების გაცემის შესაძლებლობას იტოვებს.