პარტია „დემოკრატიული საქართველოს“ ლიდერი ნინო ბურჯანაძე იმედოვნებს, რომ ეროსი კიწმარიშვილის საქმეზე კითხვები არ დარჩება და აღნიშნული საქმე ხელისუფლების მხრიდან უმოკლედ ვადებში იქნება გამოძიებული.

ბურჯანაძემ ტელეკომპანია „იმედის“ ეთერში“ გადაცემა „რეაქციაში“ სტურმობისას აღნიშნა, რომ მას არ სჯერა იმ ვერსიის, რომ ეროსი კიწმარიშვილმა თავი მოიკლა.

„მე მას ძალიან დიდი ხნის განმავლობაში ვიცნობდი და ძალიან გამჭირდება მისი თვითმკვლელობის დაჯერება, ბუნებრივია მე გამოძიების მასალების გარეშე არ შემიძლია რაიმე ვამტკიცო“,- განაცხადა ბურჯანაძემ.

პოლიტიკოსმა ეროსი კიწმარიშვილი ნიჭიერ, მრავალმხრივ და ბრძოლისუნარიან ადამიანად დაახასიათა.

„ყველაფერი უნდა გაკეთდეს იმისათვის, რომ ეს მკვლელობა (წამომცდა მტკიცებით ფორმაში), ეს საქმე გამოძიებული იყოს, ბევრი ადამიანი ფიქრობს, რომ ეს იყო მკვლელობა, მით უფრო როდესაც პრეზიდენტი აკეთებს პირველსავე წუთებში ისეთ განცხადებას როგორიც გაკეთდა და ამბობს, რომ ეს არის საზარელი მკვლელობა. ხელისუფლებამ ყველაფერი უნდა გააკეთოს, რომ ეს საქმე გამოძიებული იქნას, იმიტომ რომ კითხვები უკვე ძალიან ბევრია. ეს ხელისუფლების თავზე შესაძლოა იყოს "დამოკლეს მახვილი" თუ არ იქნა ეს საქმე გამოძიებული“,- აღნიშნა ბურჯანაძემ.

ნინა გოლოშვილი