სამხრეთ ოსეთის ადმინისტრაცია იგორ და ბათირ ფუხაევების გათავისუფლებას ითხოვს

პოლიტიკა - 20:24, 18 Jul, 2014

1354

სამხრეთ ოსეთის ადმინისტრაცია, ცხინვალის თვითაღიარებული ხელსუფლების მიერ სამრეთ ოსეთის ადმინისტრაციის თანამშრომლის დაკავებასთან დაკავშირებით განცხადებას ავრცელებს.

როგორც ,,ნიუპოსტს“ სამხრეთ ოსეთის ადმინისტრაციიდან აცნობეს, ქ. ცხინვალში სამხრეთ ოსეთის ადმინისტრაციის თანამშრომელი იგორ ფუხაევი და მისი ძმა, ცხინვალის პარლამენტის ყოფილი დეპუტატი ბათირ ფუხაევი დააკავეს.

არსებული ინფორმაციით, მათ ბრალს სდებენ სამშობლოს ღალატსა და სახელმწიფო გადატრიალების მოწყობის მცდელობაში. ორივე ძმა საკუთარი დედის დაკრძალვაზე იქნა დაკავებული.

როგორც «Эхо Кавказа» იუწყება (სტატიის ორიგინალი – http://www.ekhokavkaza.ru/content/article/25456881.html), ძმებმა ფუხაევებმა ცხინვალში ჩასვლამდე ადგილობრივი ,,ხელისუფლებისგან“ უსაფრთხოების გარანტიები მიიღეს.

ადმინისტრაციაი განმარტავენ, რომ ფუხაევების მშობლები ჩრდილოეთ ოსეთში ცხოვრობენ. მათი დედა თბილისში მკურნალობის კურსს გადიოდა, თუმცა მისი გადარჩნა ვერ მოხერხდა. „წითელი ჯვრის“ მისიის მეშვეობით შესაძლებელი გახდა მისი ცხინვალში გადასვენება. ხოლო იგორ და ბათირ ფუხაევები სამხრეთ ოსეთში ზემო ლარსის სასაზღვრო–გამშვები პუნქტის გავლით მოხვდნენ. ცხინვალში შესვლიდან 6 საათის შემდეგ მოხდა მათი დაკავება და დროებითი მოთავსების იზოლატორში გადაყვანა.

სამხრეთ ოსეთის ადმინისტრაცია კიდევ ერთხელ ყურადღებას ამახვილებს იმ ფაქტზე, რომ იგორ ფუხაევი არის აღნიშნული უწყების ხელმძღვანელის დიმიტრი სანაკოევის მრჩეველი სპორტის საკითხებში და საფეხბურთო გუნდ „სპარტაკ – ცხინვალის“ მენეჯერი (ადმინისტრაციასთან არსებული საფეხბურთო კლუბი). მას არანაირი კავშირი არ აქვს ცხინვალის რეგიონში „გადატრიალებასთან“, ხოლო სამშობლოს ღალატში მისი დადანაშაულება კატეგორიულად მიუღებელია.

ცხინვალის ე.წ. ხელისუფლების მოქმედებები სამხრეთ ოსეთის ადმინისტაციაში მიაჩნიათ არაკანონიერად, ხოლო დაკავებას პოლიტიკურ მიზეზებს უკავშირებენ.

სამხრეთ ოსეთის ადმინისტრაცია თხოვნით მიმართავს საქართველოს სახალხო დამცველის აპარატს, არასამთავრობო და საერთაშორისო ორგანიზაციებს რათა მათ მაქსიმალური ძალისხმევა გაიღონ და ხელი შეუწყონ იგორ და ბათირ ფუხაევების გათავისუფლებას.