ალბანეთსა და საქართველოს სამთავრობო უწყებებს შორის თანამშრომლობა ოფიციალურად შევიდა ძალაში

პოლიტიკა - 12:13, 18 Jul, 2014

1315

ალბანეთმა საქართველოს იუსტიციის სამინისტროსა და ალბანეთის ინოვაციებისა და საზოგადოებრივი ადმინისტრირების სამინისტროებს შორის ხელმოწერილი ურთიერთგაგების მემორანდუმის ძალაში შესვლის შიდა პროცედურა დაასრულა.

ურთიერთგაგების მემორანდუმი ორი ქვეყნის უწყებებს შორის თანამშრომლობას სხვადასხვა მიმართულებით ითვალისწინებს, მათ შორის, იუსტიციის სახლების ექსპორტს ალბანეთში. აღსანიშნავია, რომ სახელმწიფო სერვისების ერთ სივრცეში ორგანიზების ქართული მოდელის სხვა ქვეყნებში დანერგვა საქართველოს იუსტიციის სამინისტროს ერთ-ერთი მთავარი პრიორიტეტია, რისთვისაც აქტიური მუშაობა მიმდინარეობს.

ურთიერთგაგების მემორანდუმს საქართველოს იუსტიციის მინისტრმა თეა წულუკიანმა და ალბანეთის ინოვაციებისა და საზოგადოებრივი ადმინისტრირების მინისტრმა მილენა ჰარიტომ ალბანელი მინისტრის საქართველოში ოფიციალური ვიზიტის დროს მიმდინარე წლის აპრილში მოაწერეს ხელი. მილენა ჰარიტოს ვიზიტის ძირითადი მიზანი საქართველოს გამოცდილების გაზიარება და ერთობლივი პროექტების განხორციელების დაგეგმვა იყო. ამავე ვიზიტისას დაიწყო მუშაობა ალბანეთში იუსტიციის სახლის კონცეფციის რეალიზებისა და მონაცემთა გაცვლის პლატფორმის შექმნისთვის სამოქმედო გეგმის შემუშავებაზე. საქართველოს იუსტიციის მინისტრის დავალებით შეიქმნა ექსპერტთა ჯგუფი, რომელიც მომავალ კვირაში ტირანაში გაემგზავრება და ალბანელ კოლეგებთან ერთად პროექტის განხორციელებისათვის მოსამზადებელ სამუშაოებს დაიწყებს.

აღსანიშნავია, რომ საქართველოს იუსტიციის სამინისტრო იუსტიციის სახლის მოდელის ექსპორტთან დაკავშირებით მოლაპარაკებებს რამდენიმე ქვეყანასთან აწარმოებს.

ნინა გოლოშვილი