ჟურნალისტ ინგა გრიგლიას თქმით, ეროსი კიწმარიშვილს ძალიან ბევრი გეგმები ჰქონდა და ის თავს არ მოიკლავდა. ამის შესახებ გრიგოლიამ ჟურნალისტებთან საუბრისას განაცხადა. მისი თქმით, კიწმარიშვილის თვითმკვლელობის ვერსიას ის ფაქტებიც გამორიცხავს, რომელიც ტელევიზიით ვრცელდება. კერძოდ, თითის ანაბეჭდები კამერაზე, ჩართული ფარები და შეკრული ღვედი.

„არ მჯერა იმის, რომ ეროსიმ თავი მოიკლა. თუ ვინმე მას იცნობდა, ეს მისთვის დაუჯერებელია. ჯერ-ჯერობით ამ ტრაგედიასთან დაკავშირებით ბევრი კითხვაა. რაც ვნახე „კურიერში“ კამერიდან დაწყებული, თითის ანაბეჭდებით, ჩართული ფარებით, შეკრული ღვედით დამთავრებული, ყველაფერი ამაზე მეტყველებს. ასევე, ბოლო პერიოდში აქტიური შეხება მქონდა მასთან გამომდინარე იქედან, რომ ის საარჩევნო პროცესში იყო ჩართული და არაერთხელ გვისაუბრია არჩევნზე გადაცემაში სტუმრობასთან დაკავშირებით. ის ჰიპერაქტიური იყო. არჩევნების მეორე ტურის წინა დღეს ვისაუბრეთ ბოლოს და მითხრა, რომ აქვს ძალიან მაგარი გეგმები. მე არ მომეჩვენა, რომ ის იყო დეპრესიული და იმ მდგომარეობაში“,- განაცხადა ინგა გრიგოლიამ.