„შსს-ზე ზედამხედველობის ფუნქციის განხორციელების ინსტიტუციურად ჩამოყალიბებას დაახლოებით სამი წელი დასჭირდება“, - ამის შესახებ განცხადება შს მინისტრის მოადგილემ ლევან იზორიამ გააკეთა.

მისივე განმარტებით ზედამხედველობის ფუნქცია ასოცირების დღის წესრიგშია გათვალისწინებული:

„რაც შეეხება ზედამხედველობის ფუნქციას, როგორც ითქვა, ეს გათვალისწინებულია ასოცირების დღის წესრიგში. ჩვენ, რა თქმა უნდა, ამ ვალდებულებას მხარი დავუჭირეთ და ამ სამ წელიწადში შეიძლება, უფრო მოკლე პერიოდში, შესაძლებელი იქნება სამართალდამცველთა მოქმედების გარე კონტროლის მექანიზმების, მათ შორის ზედამხედველობის მექანიზმის ინსტიტუციონალურად ჩამოყალიბება. უკვე დაიწყო სამუშაო ჯგუფის შექმნა და ამ ვალდებულებების შესრულებაზე საჯაროდ გეცნობებათ

იზორიამ სისტემის დეპოლიტიზირებასთან დაკავშირებითაც გააკეთა კომენტარი და განაცხადა, რომ უწყებამ ამ კუთხით წარმატებას მიაღწია:

„ჩვენ ამ თვალსაზრისით მნიშვნელოვან წარმატებებს მივაღწიეთ. ამერიკელი და ევროპელი კოლეგების რეკომენდაციით გამოვეცით მინისტრის ბრძანება, რომელიც არჩევნების პერიოდში შინაგან საქმეთა სამინისტროს მომსახურეთა სახელმძღვანელო ინსტრუქციას განსაზღვრას, სადაც მკაცრად არის გაწერილი, თუ რა უფლებები და ვალდებულებები აქვთ მათ და ეს სწორედ ამ მიმართულებით (სისტემის დეპოლიტიზირების კუთხით) გადადგმული ნაბიჯია“, - განმარტა იზორიამ.

ანო თორელი