სახალხო დამცველი უჩა ნანუაშვილი აცხადებს, რომ გასულ წელს სიცოცხლისა და თავისუფლების უფლებების ხელყოფის ფაქტები დაფიქსირდა, მთავარ პროკურატურას კი აღნიშნული ფაქტების ეფექტური გამოძიებისკენ მოუწოდებს:

„სიცოცხლის უფლებასთან დაკავშირებით, სამწუხაროდ, კვლავ იყო პრობლემები. ამ უფლების ხელყოფის რამდენიმე ფაქტი იყო და ამაზე დეტალურად არის საუბარი ჩვენს ანგარიშში. სახალხო დამცველის რეკომენდაცია პროკურატურისადმი იმაში მდგომარეობს, რომ სწრაფად და ეფექტურად იქნას გამოძიებული მამუკა მიქაუტაძის და სხვა რამდენიმე საქმე, რომლებიც გასულ და მიმდინარე წელს დაფიქსირდა. ასევე უნდა ჩაატაროს ეფექტური და სწრაფი გამოძიება უგზო-უკვლოდ გაუჩინარებულ პირთა, მათ შორის რუსეთის მოქალაქე მაგომედ მაგომედოვის გაუჩიონარების ფაქტზე, რომელიც გასული წლის აპრილში გაუჩინარდა და მისი ადგილსამყოფელი დღემდე უცნობია. ჩვენი რეკომენდაცია ასევე ეხება 2008 წლის აგვისტოს საომარი მოქმედებების დროს და შემდგომ პერიოდში ჩადენილ სავარაუდო დანაშაულებრივ ქმედებებს, მათ შორის უგზო-უკვლოდ დაკარგულ პირთა საქმეების გამოძიებას. ეს არის რომის სტატუტის მოთხოვნა, რომლის წევრებიც ვართ ჩვენ და ამ მიმართულებით არანაირი აქტიური ნაბიჯები, სამწუხაროდ, არ გადადგმულა“,- განაცხადა ნანუაშვილმა.

ანო თორელი