თბილისის ახლად არჩეული მერი დავით ნარმანია იმ მიზეზებზე საუბრობს, რის გამოც მან თვითმმართველობის არჩევნებში 50%-იანი ბარიერი ვერ გადალახა. როგორც გადაცემა „პოლიტიკის დროში“ ნარმანიამ განაცხადა, იყო გარკვეული ნიუანსები, რის გამოც მან ბარიერი ვერ გადალახა.

„პირველ ტურში ძალიან აქტიურად ვიბრძოდით და აქტიური წინასაარჩევნი კამპანია გვქონდა, თუმცა იყო გარკვეული ნიუანსები, საიდან გამომდინარეც ვერ გადავლახეთ ბარიერები. როგორც ჩანს, ვერ მივიტანეთ თითოეულ ამომრჩეველთან ის პროგრამა, რომელიც გვქონდა მომზადებული. აქედან გამომდინარე შევჩერდით 47%-ზე. იყო მეორე მონეტიც, რომ ყველა პარტია ჩვენს წინააღმდეგ იბრძოდა. ყველა ცდილობდა თითო ხმა წაერთმია ჩვენთვის. რაც შეეხება მეორე ტურს, სწრაფი მობილიზაცია გავაკეთეთ. რამდენიმე დღე ჩვენი გუნდი იყო ჩაკეტილი, რომ გადაგველაგებინა პიარ სტრატეგია, რამაც დამაჯერებელი გამარჯვება მოგვიტანა. შევცვალეთ სტრატეგია, თითოეულ ოჯახში მივედით, მივაწოდეთ ჩვენი პროგრამა და დავიმსახურეთ მეტი ადამიანის ნდობა“, - აცხადებს ნარმანია.