„უუნაგირო ცხენი ვარ, ბუნებით ისეთი ადამიანი ვარ, რომ არც ერთი სპეცსამსახური არ მომენდობოდა“, - ამის შესახებ საქართველოს ექს-პრეზიდენტმა მიხეილ სააკაშვილმა Haqqin.az-თან ექსკლუზიურ ინტერვიუში ჟურნალისტის კითხვის საპასუხოდ განაცხადა.

ჟურნალისტი იმ ბრალდებებით დაინტერესდა, რომელიც საქართველოს ექს-პრეზიდენტის ამერიკის ცენტრალურ სადაზვერვო სამმართველოსთან თანამშრომლობის თაობაზე ისმის.

"არ ვარ ადამიანი, რომლის კონტროლიც შესაძლებელია. არასდროს მყოლია უფროსი. ვიყავი დამოუკიდებელი იურისტი ამერიკაში, შემდეგ – დეპუტატი. რაღაც დროის განმავლობაში ვიყავი მინისტრი, დამოუკიდებელი მინისტრი. ამის შემდეგ - თბილისის საკრებულოს თავმჯდომარე. საბოლოოდ, ქართულ ოპოზიციას ჩავუდექი სათავეში და შემდეგ საქართველოს პრეზიდენტად ამირჩიეს. ვერ წარმომიდგენია, როგორ შეიძლება ჩემი გამოძახება და რაიმე დავალებების მოცემა. როგორც იტყვიან, უუნაგირო ცხენი ვარ. ისეთი ადამიანი ვარ, რომ არც ერთი სპეცსამსახური არ მომენდობოდა. ენაზე კბილის დაჭერა არ შემიძლია", - განაცხადა მიხეილ სააკაშვილმა.