ბასტილიის აღების დღისადმი მიძღვნილ მიღებაზე საქართველოს პრემიერმინისტრმა ირაკლი ღარიბაშვილმა განაცხადა, რომ საფრანგეთის რევოლუცია ევროპული ცივილიზაციისთვის გარდამტეხი ეტაპი გახდა.

“თქვენო აღმატებულებავ, ბატონო ელჩო, ქალბატონებო, ბატონებო! ძვირფასო ფრანგო მეგობრებო, ნება მომეცით, პირველ რიგში, გამოვხატო ჩემი გულწრფელი სიხარული, რომ პატივი მაქვს თქვენთან ერთად აღვნიშნო ეს დღე. მე მსურს, საქართველოს მთავრობისა და პირადად ჩემი სახელით მოგილოცოთ საფრანგეთის რესპუბლიკის ეროვნული დღესასწაული და გისურვოთ ყოველივე საუკეთესო.

საფრანგეთი ორ საუკენეზე მეტია, აღნიშნავს 14 ივლისს - ბასტილიის აღების დღეს. საფრანგეთის რევოლუცია ევროპული ცივილიზაციისთვის გარდამტეხი ეტაპი გახდა. ამ დღემ განსაზღვრა საფრანგეთის და შემდეგ უკვე მთელი ევროპის მომავალი. სწორედ ამიტომ ამ დღეს საფრანგეთთან ერთად აღნიშნავს ყველა, ვისთვისაც ძვირფასია დემოკრატიული ღირებულებები, ვინც ამ ღირებულებებით აშენებს საკუთარ ქვეყანას და მის მომავალს. დღეს მე კიდევ ერთხელ მეძლევა საშუალება მადლობა გადავუხადო საფრანგეთის პრეზიდენტს ბატონ ფრანსუა ორლანდს და ფრანგ ხალხს იმ დიდი მხარდაჭერისათვის, რომელსაც ისინი იჩენენ ჩემი ქვეყნის - საქართველოს მიმართ ამ რთულ პერიოდში.

მე განსაკუთრებული დამოკიდებულება და სითბო მაკავშირებს საფრანგეთთან და ფრანგ ხალხთან. არ შემიძლია განსაკუთრებული ნოსტალგიით არ გავიხსენო ის ორი წელი, რომელიც მე გავატარე პარიზში. მე ვიყავი სორბონის უნივერსიტეტის სტუდენტი და ეს დრო ძვირფასი და სრულიად დაუვიწყარია ჩემთვის.

მინდა, გითხრათ, ჩვენთვის დიდი პატივია იმის ხილვა, რომ ჩვენმა სამხედროებმა ამ დილით პირველი მსოფლიო ომის 100 წლისთავის აღსანიშნავ ღონისძიებაზე ქართული დროშით ჩაიარეს პარიზში, ელისეს მინდვრებზე. ბატონო ელჩო, მე ასევე მინდა ვუსურვო წარმატებები და კეთილდღეობა თქვენს ქვეყანას და ფრანგ ხალხს”, - განაცხადა პრემიერ-მინისტრმა.