„ერგნეთის ბაზრობის გახსნა საინტერესო ინიციატივაა, თუ თანამედროვე სტანდარტებით და ფორმებით გაკეთდება“, - ამის შესახებ რუსეთთან ურთიერთობის საკითხებში პრემიერის სპეციალურმა წარმომადგენელმა ზურაბ აბაშიძემ განაცხადა. მისი თქმით, აღნიშნულ საკითხზე გრიგორი კარასინთან შეხვედრის დროს საუბარი არ ყოფილა. აბაშიძე მიიჩნევს, რომ ბაზრობის გახსნა შეიძლება მომხიბვლელი გახდეს რეგიონში მცხოვრები ქართველებისთვის.

„ეს თემა კარასინთან სასაუბრო არაა. ჩვენს ტერიტორიაზე რას გავხსნით, ჩვენი გადასაწყვეტია, ჩვენი ასაშენებელია და ვნახოთ მერე, ეს როგორ იმუშავებს. თუ თანამედროვე სტანდარტებით და ფორმებით გაკეთდება, შეიძლება ეს მართლაც მომხიბვლელი გახდეს იმ რეგიონში მცხოვრები ქართველებისთვის, ოსებისთვის და ყველასთვის, ვისაც ვაჭრობა აინტერესებს. ნამდვილად გამოაცოცხლებს იმ რეგიონს. ეს თემა ამ ეტაპზე მათთან სამსჯელო არ არის, თუმცა საბოლოო ჯამში, რატომ უნდა იყოს ვინმე ამის წინააღმდეგი“, - განაცხადა ზურაბ აბაშიძემ.

არსებული ინფორმაციით, მთავრობა ე.წ. ერგნეთის ბაზრობის ალტერნატიულ ვარიანტზე მუშაობს. სავაჭრო ცენტრის გახსნა არა მხოლოდ ქვემო ქართლში, არამედ ზუგდიდშიც არის დაგეგმილი. წინასწარი ინფორმაციით, ხელისუფლება ოკუპირებულ რეგიონებთან თავისუფალი ეკონომიკური ზონების შექმნას აპირებს.