თბილისის საკრებულოს განახლებულ დარბაზში ახალი მოწვევის დეპუტატები შეიკრიბებიან.

პროცედურის მიხედვით საკრებულოს კანონიერებას პირველ სხდომაზე ცესკოს თავმჯდომარე დაადასტურებს, რის შემდეგაც თავმჯდომარეობას საკრებულოს უხუცესი დეპუტატი, სევდია უგრეხელიძე გადაიბარებს.

დღესვე დეპუტატებმა საკრებულოს ახალი თავმჯდომარე უნდა აირჩიონ, წინასწარი ინფორმაციით, აღნიშნულ თანამდებობაზე გიორგი ალიბეგაშვილის წარდგენა მოხდება.

„ერთიანი ნაციონალური მოძრაობა“ უმრავლესობის მიერ დასახელებული არცერთი კანდიდატის მხარდაჭერას არ აპირებს:

„ვინც არ უნდა იყოს თავმჯდომარე, იგი იქნება დამოკიდებული რაღაც სხვა გარეშე ძალებზე და პირადად ვერავითარ შემთხვევაში ვერ მოახდენს გავლენას საკრებულოს მუშაობაზე, ინსტრუქციების გარეშე, ინსტრუქციები კი მოდის შუშის სასახლიდან. აქედან გამომდინარე, ჩვენ ვერ დავუჭერთ მხარს უმრავლესობის კანდიდატურას. მოვისმინე ნარმანიას კომენტარი, მას ოპოზიციასთან თანამშრომლობაზე ერთი სიტყვაც კი არ უთქვამს. აქედან გამომდინარე მე ველოდები, რომ ისინი ყველაფერს ერთპიროვნულად და ავტორიტარულად გადაწყვეტენ“, - განაცხადა სევდია უგრეხელიძემ.