ცენტრალური საარჩევნო კომისიის წინასწარ შედეგებს „ქართული ოცნების“ თბილისის მერობის კანდიდატი დავით ნარმანია ეხმაურება. ნარმანია მადლობას უხდის თოთოეულ ამომრჩეველს, რომელმაც მის გუნდს მხარი დაუჭირა.

„მინდა მივულოცო ჩემს კოლეგებს, რომლებიც მეორე ტურში გახდნენ გამარჯვებულები. დიდი მალდობა თითოეულ ამომრჩეველს, რომელმაც დამიჭირა მხარი მე და დაუჭირა მხარი ჩვენს გუნდს. ამომრჩეველმა მიიღო ისეთი გადაწყვეტილება, როგორიც ჩვენს დედაქალაქს ეკადრება. ორშაბათიდან მაქსიმალურ მუშაობას ვიწყებთ, რომ ჩვენი დაპირება მაქსიმალურად შევასრულოთ. თბილისი მალე ნახავს ჩვენი გუნდის ხელს. რამდენიმე დღე დასჭირდება შედეგების ოფიციალურ გაფორემაბას. ამის შემდეგ დავიწყებ აქტიურ მუშაობას. პირველივე დღეს მივიღებ გადაწყვეტილებას, რომელსაც ჩვენი მოსახლეობა ყველაზე მეტად ითხოვს. მერიის სისტემა იქნება გამჭირვალე. პირველი დღეს გამგებლების და მერიის სისტემაში მოქალაქეთა მიღების წესი დამტკიცდება“, - განაცხადა ნარმანიამ.

ცენტრალური საარჩევნო კომისიის ინფორმაციით, თვითმმართველობის არჩევნებში „ქართული ოცნების“ თბილისის მერობის კანდიდატმა დავით ნარმანიამ 73,51% მიიღო, ხოლო „ნაციონალური მოძრაობის“ თბილისის მერობის კანდიდატმა ნიკა მელიამ 26,49%.