„ქართულ ოცნებას“ დეზინფორმაციის გავრცელებით სურს გადაფაროს ის ძალადობრივი ფონი, რომელსაც ის მიმართავდა და ეხლაც მიმართავს“, - ამის შესახებ „ნაციონალური მოძრაობის“ ერთ-ერთმა ლიდერმა ზურაბ ჭიაბერაშვილმა გიოგი გეგეჭკორის მიერ ცოტა ხნის წინ გაკეთებული განცხადების საპასუხოდ განაცხადა. როგორც „ნიუპოსტთან“ საუბარში ჭიაბერაშვილმა აღნიშნა, ხელისუფლების სტრატეგიაა, რომ უბნებზე ხმების დათვლის მომენტში რაც შეიძლება ნაკლები დამკვირვებელი იყოს. მისივე თქმით, ხელისუფლება ამის განსახორციელებლად პოლიციას იყენებს.

„მათი ტაქტიკაა, რომ ხელი შეუშალონ დამკვირვებლებს, რომ მშვიდ გარემოში დააკვირდნენ არჩევნებს. ამისათვის მათ მობილიზებული ჰყავთ პოლიციაც. მათ არ დაუკავებიათ არც ერთი ადამიანი, რომელიც ფიზიკურ შეურაცხყოფას აყენებს დამკვირვებლებს. აქედან გამომდინარე, ნათელია, რომ „ქართული ოცნების“ კოორდინატორებიც და პოლიციაც საკმაოდ კოორდინირებულად მოქმედებენ და ხელისუფლების სტრატეგიაა, რომ უბნებზე ხმების დათვლის მომენტისთვის რაც შეიძლება ნაკლები დამკვირვებელი იყოს. რაც შეეხება „ქართული ოცნების“ მიერ გაკეთებულ განცხადებას, ეს არის მათი ჩვეულებრივი დაკვეთა, რომ გაავრცელონ ტყუილი და დეზინფორმაცია. მსგავსი დეზინფორმაციის გავრცელებით, „ქართულ ოცნებას“ სურს გადაფაროს ის ძალადობრივი ფონი, რასაც ის მიმართავდა დღემდე და რასაც დღესაც აგრძელებს“, - განაცხადა „ნიუპოსტთან“ საუბარში ზურაბ ჭიაბერაშვილმა.

"ქართული ოცნების" საარჩევნო შტაბის პრესსპიკერმა გიორგი გეგეჭკორმა „ნაციონალური მოძრაობა“ და მისი მხარდამჭერები არეულობების მოწყობის მცდელობაში დაადანაშაულა.