„ნაციონალური მოძრაობის“ ერთ-ერთი ლიდერის ზურაბ ჭიაბერაშვილის ინფორმაციით, საარჩევნო უბნებზე პოლიციელების მხრიდან „მიკერძოებულ დაკავებას აქვს ადგილი“. მისი ინფორმაციით, ცოტა ხნის წინ „ნაციონალური მოძრაობის“ ორი აქტივისტი ნუგზარ მკალავიშვილი და მერაბ ბადაგიძე უსაფუძვლოდ დააკავეს. როგორც ჭიაბერაშვილი აცხადებს, „ქართული ოცნების“ აქტივისტების ძალადობის მიუხედავად, ისინი დაუსჯელები რჩებიან.

"კოალიცია „ქართულმა ოცნებამ“ აჩვენა ქართულს საზოგადოებას, რომ არჩევნებში ბიძინა ივანიშვილის მიერ შერჩეული კანდიდატის, დავით ნარმანიას, თბილისში გაყვანას ძალადობრივი მეთოდებით აპირებს. წინა არჩევნებზე ძალადობის უპრეცედენტო ტალღა ვიხილეთ და ეს ტალღა დღესაც გრძელდება და ამას თან ახლავს პოლიციის მხრიდან მიკერძოებულად, მხოლოდ ჩვენი წარმომადგენლების დაკავება. მოძალადე „ქართული ოცნების“ აქტივისტები კი დაუსჯელნი რჩებიან. ამ წუთებში მაცნობეს, რომ კრწანისში სრულიად უსაფუძვლოდ დააკავეს „ნაციონალური მოძრაობის“ აქტივისტები ნუგზარ მკალავიშვილი და მერაბ ბადაგიძე. „ქართული ოცნების“ არც ერთი აქტივისტი, რომელმაც რომლებმაც შეტევა მიიტანეს კამერით აღჭურვილ დამკვირვებლებზე, დაკავებული არ არიან. შეგვიძლიათ ვთქვათ, რომ ხელისუფლება და პირადად ღარიბაშვილი პოლიციის დახმარებით, ხელების გადაგრეხვით, აპირებს დაასრულოს არჩევნები. ძნელია ეს არჩევნები შეფასდეს დემოკრატიულად“, - განაცხადა ჭიაბერაშვილმა.