ისრაელში შექმნილი ვითარების გამო, ისრაელში საქართველოს საელჩო განცხადებას ავრცელებს.

განცხადებაში ნათქვამია, რომ ქვეყანაში შექმნილი ვითარების გათვალისწინებით, ისრაელში საქართველოს საკონსულოში მოქმედებს ცხელი ხაზი.

საქართველოს მოქალაქეებს, საჭიროების შემთხვევაში, შეუძლიათ დაუკავშირდნენ საქართველოს წარმომადგენლობას ცხელი ხაზის ნომერზე +972-526919092. ასევე ისრაელის სამხრეთი და ცენტრალური რეგიონების ყველა დიდ დასახლებულ პუნქტში გახსნილია საზოგადოებრივი თავშესაფარი. სარაკეტო თავდასხმის შემთხვევაში, საზოგადოებრივი თავშესაფარის გამოყენება შეუძლია ნებისმიერ მოქალაქეს. საქართველოს საელჩო ისრაელში საკუთარ ვებგვერდზე აქვეყნებს ისრაელის შესაბამისი უწყებების მიერ გავრცელებულ ინსტრუქციებს. მასში მოყვანილია ის ძირითად პრინციპები, რომლებიც მოქალაქეების მიერ უნდა იყოს დაცული სარაკეტო თავდასხმის მაუწყებელი განგაშის გამოცხადების შემთხვევაში: 1) განგაში გაისმა მაშინ, როცა იმყოფებით შენობაში: თავი შეაფარეთ სახლში არსებულ სპეციალურად დაცულ ოთახს. თუ ასეთი ოთახი არ არსებობს, მაშინ უნდა მიაკითხოთ სახლთან არსებულ უახლოეს საზოგადოებრივ თავშესაფარს. საზოგადოებრივი თავშესაფარი ისრაელის ყველა დასახლებულ პუნქტში არსებობს; 2) იმყოფებით შენობის გარეთ: შეგიძლიათ თავი შეაფაროთ უახლოეს შენობაში არსებულ თავშესაფარს. თუ იმყოფებით მანქანაში და გაიგეთ სარაკეტო თავდასხმის მაუწყებელი განგაში, უნდა შეაჩეროთ მანქანა, გადააყენოთ გზის სავალი ნაწილიდან, გადმოხვიდეთ და მიაკითხოთ უახლოეს თავშესაფარს (საზოგადოებრივს ან შენობაში არსებულს). ასეთის არ არსებობის შემთხვევაში, დაწექით მიწაზე მანქანიდან მოშორებით და თავი დაიფარეთ ხელებით. დაცული ტერიტორიის დატოვება შესაძლებელია განგაშიდან 10 წუთის გასვლის შემდეგ. დეტალური ინფორმაციის მიღება შესაძლებელია ისრაელის ზურგის სამსახურის ვებგვერდს შემდეგ მისამართზე: www.oref.org.il ან აღნიშნულ ორგანიზაციას დაუკავშირდეთ ტელეფონის ნომერზე 104.