"ევროკავშირი გაზრდის მშვიდობის, დემოკრატიისა და ეკონომიკური განვითარების შესაძლებლობას"

"ევროკავშირი გაზრდის მშვიდობის, დემოკრატიისა და ეკონომიკური განვითარების შესაძლებლობას" - ღარიბაშვილი

პოლიტიკა - 10:47, 11 Jul, 2014

1517

საქართველოს პრემიერ-მინისტრ ირაკლი ღარიბაშვილის განცხადებით, საქართველოს უსაფრთხოებისა და სტაბილურობის უზრუნველყოფის საქმეში ევროკავშირი მთავარ როლს თამაშობს.

პრემიერის განცხადებით, აღნიშნული ფაქტი მხარდამჭერ პოლიტიკურ განცხადებებში, ჟენევის მოლაპარაკებებისა და სხვა მნიშვნელოვანი აქტივობების მხარდაჭერაში აისახება.

ამის შესახებ ირაკლი ღარიბაშვილმა, ბათუმში, "საქართველოს ევროპული გზის" მე-11 საერთაშორისო კონფერენციაზე სიტყვით გამოსვლის დროს განაცხადა.

"ჩვენ იმედი გვაქვს, რომ რეგიონში მშვიდობისა და სტაბილურობის უზრუნველყოფისათვის გადადგმულ ნაბიჯებთან ერთად, ევროკავშირი მხარს დაგვიჭერს რეფორმების გატარებაში. ამ კონტექსტში ჩვენ ვაფასებთ "აღმოსავლეთის პარტნიორობის" პრინციპს - "მეტი მეტისათვის" და მხარს ვუჭერთ ევროკავშირის გეგმას, რომ მომდევნო წლებში უფრო აქტიურად გამოიყენოს დიფერენცირების ეს მეთოდი", - განაცხადა ღარიბაშვილმა.

მისივე განცხადებით, ევროკავშირში საქართველოს მოქალაქეთა უვიზო მიმოსვლა შეიძლება ჩაითვალოს საქართველოს ევროინტეგრაციის ყველაზე მომხიბვლელ მოკლევადიან შედეგად, რომელიც საზოგადოების მოლოდინს გაამართლებს და სარგებელს მოუტანს საქართველოს მოქალაქეებს.

"საქართველომ, უკრაინამ და მოლდოვამ, როგორც აღმოსავლეთის პარტნიორობის ქვეყნებმა, უკვე გააკეთეს ისტორიული არჩევანი და აირჩიეს ევროინტეგრაციის გზა. ამ ქვეყნების ცალსახა არჩევანის აღიარებით და მათთვის ევროკავშირში გაწევრიანების პერსპექტივის მინიჭებით, რამდენად შორეულიც არ უნდა იყოს ის, ევროკავშირი წარმოუდგენლად გაზრდის რეგიონში მშვიდობის, დემოკრატიისა და ეკონომიკური განვითარების შესაძლებლობას. ჩვენთვის სასიხარულოა, რომ ევროკავშირში ამ მიდგომის მხარდამჭერთა რიცხვი სულ უფრო იზრდება. ჩვენ გვჯერა, რომ სულ მალე ყველა ევროპელი პარტნიორი აღიარებს, რომ ეს მხარდაჭერა იყო ბრძნული გადაწყვეტილება", - აღნიშნა საქართველოს პრემიერმა.