სოფლის მეურნეობის სამინისტროს ,,ნაციონალურ მოძრაობას“ განცხადებით პასუხობს

პოლიტიკა - 22:04, 10 Jul, 2014

1589

სოფლის მეურნეობის სამინისტრო სპეციალურ განცხადებას ავრცელებს და ,,ნაციონალურ მოძრაობას" პასუხობს.
როგორც უწყების მიერ გავრცელებულ განცხადებაში აღნიშნული, დღეს ,,შეღავათიანი აგროკრედიტის ფარგლებში“ დაფინანსებული 74 ახალი საწარმოს შესახებ არასწორი ინფორმაცია გავრცელდა.
„ნაციონალური მოძრაობის“ ადგილობრივი თვითმმართველობის არჩვენებში მონაწილე კანდიდატები, მთავრობას სიცრუეში ადანაშაულებენ და აცხადებენ, რომ სოფლის მეურნეობის სამინისტროს მიერ „შეღავათიანი აგროკრედიტის პროექტის ფარგლებში“ დაფინანსებული საწარმოების შესახებ გავრცელებული ინფორმაცია სიმართლეს არ შეესაბამება.

ყვარელსა და რუსთავში„ნაციონალური მოძრაობის“ წევრების მიერ მითითებულ მისამართებზე რეგისტრირებული არიან „შეღავათიანი აგროკრედიტის პროექტით“ მოსარგებლე პირები - ზაქარია აბულაშვილი (რუსთავი) და ლევან ფარესაშვილი (ყვარელი). აღნიშნულმა პირებმა მიიღეს სესხი „შეღავათიანი აგროკრედიტის პროექტის“ ფარგლებში არა ახალი საწარმოს დასაფუძნებლად, არამედ არსებული მცირე მეურნეობების მოწყობის, და გაფართოების მიზნით. აღნიშნული სახის სესხი პროექტის ფარგლებში 13 ათასამდე პირმა მიიღო.

მთავრობის ინიციატივით შემუშავებული „შეღავათიანი აგროკრედიტის პროექტის“ მთავარ მიზანს გლეხების, ფერმერებისა და მეწარმეებისათვის იაფ ფულად რესურსზე ხელმისაწვდომობის უზრუნველყოფა წარმოადგენს.

დღეის მონაცემებით, მთლიანობაში „შეღავათიანი აგროკრედიტის პროექტის“ ფარგლებში 18.000-ზე მეტ ფიზიკურ და იურიდიულ პირზე სესხის სახით გაცემულია 400 მლნ-მდე ლარი. კიდევ ერთხელ გვინდა განვმარტოთ, რომ „შეღავათიანი აგროკრედიტის პროექტის“ ფარგლებში გაცემულია სესხები არა მხოლოდ ახალი საწარმოების დაფინანსებისთვის, არამედ მცირე ფერმერული მეურნეობების მხარდასაჭერად. რაც არანაკლებ მნიშვნელოვანია დარგის განვითარებისთვის.

სოფლის მეურნეობის სამინისტრომ და სოფლის მეურნეობის პროექტების მართვის სააგენტომ საჯარო გახადა პროექტის ფარგლებში დაფინანსებული 74 ახალი საწარმოს ჩამონათავალი, ასევე საჯაროა ინფორმაცია პროექტის ფარგლებში 570-ზე მეტი მსესხებლის შესახებ, რომლებმაც შეღავათიანი კრედიტით უკვე არსებული საწარმოების გაფართოება-გადაიარაღება მოახდინეს.

და ბოლოს, სოფლის მეურნეობის სამინისტრო მზად არის ნებისმიერ დაინტერესებულ პირს ,,შეღავათიანი აგროკრედიტის პროექტის“ ფარგლებში დაფინანსებული 74 ახალი საწარმოს შესახებ დეტალური და ამომწურავი ინფორმაცია მიაწოდოს", - ნათქვამია სამინისტროს განცხადებაში.