ქართული დელეგაცია ჟენევაში

პოლიტიკა - 19:21, 10 Jul, 2014

1602

2014 წელს „სამოქალაქო და პოლიტიკური უფლებების შესახებ“ 1966 წლის საერთაშორისო პაქტის მე-40 მუხლის შესაბამისად საქართველოს მთავრობა გაერო-ს ადამიანის უფლებათა კომიტეტში პაქტის შესრულების შესახებ მეოთხე პერიოდულ ანგარიშს წარადგენს.
ანგარიშის განხილვა ადამიანის უფლებათა კომიტეტის 111-ე სესიაზე დღეს იწყება და ორი დღის განმავლობაში გაგრძელდება. ანგარიშს წარმოადგენს საქართველოს დელეგაცია, იუსტიციის მინისტრ თეა წულუკიანის ხელმძღვანელობით.
დელეგაცია დაკომპლექტებულია საკანონმდებლო, სასამართლო და აღმასრულებელი ხელისუფლების იმ ორგანოების წარმომადგენლებისგან, რომლებიც მონაწილეობდნენ პერიოდული ანგარიშის მომზადებაში და პასუხისმგებელნი არიან ადამიანის სამოქალაქო და პოლიტიკური უფლებების დაცვის კუთხით საქართველოში არსებულ ვითარებაზე.

ანგარიშის განხილვაში მონაწილეობენ საქართველოს იუსტიციის მინისტრის მოადგილე გოჩა ლორთქიფანიძე, საქართველოს პარლამენტის ადამიანის უფლებათა კომიტეტის თავმჯდომარე ეკა ბესელია, პარლამენტარი თინათინ ხიდაშელი, სასჯელაღსრულებისა და პრობაციის მინისტრის მოადგილე არჩილ თალაკვაძე, პერსონალურ მონაცემთა დაცვის ინსპექტორი თამარ ქალდანი და სხვადასხვა უწყების წარმომადგენლები.

„სამოქალაქო და პოლიტიკური უფლებების შესახებ“ 1966 წლის საერთაშორისო პაქტი ადამიანის უფლებების ერთ-ერთი ყველაზე ზოგადი საერთაშორისო კონვენციაა, რომლის მაღალ დონეზე შესრულებაც სახელმწიფოს მხრიდან ადამიანის უფლებათა ჯეროვან დაცვაზე მიუთითებს.