უჩა ნანუაშვილი თომას ჰამარბერგის რეკომენდაციებს მიესალმება

პოლიტიკა - 18:29, 10 Jul, 2014

610

საქართველოს სახალხო დამცველი უჩა ნანუაშვილი საქართველოში საკონსტიტუციო და იურიდიული რეფორმებისა და ადამიანის უფლებათა საკითხებში ევროკავშირის სპეციალური მრჩევლის თომას ჰამარბერგის მიერ მომზადებულ დასკვნითი რეკომენდაციების გამოქვეყნებას მიესალმება.
როგორც სახალხო დამცველის აპარატში აცხადებენ, რეკომენდაციები შეეხება ყველა იმ მნიშვნელოვან საკითხს, რაც ქვეყანაში ადამიანის უფლებების დაცვის, კანონის უზენაესობისა და ქვეყნის დემოკრატიული განვითარებისთვის არსებითი მნიშვნელობისაა.
მათივე განცხადებით, რეკომენდაციები შეეხება ადამიანის უფლებების ეროვნული სტრატეგიისა და სამოქმედო გეგმის განუხრელ შესრულებას და მონიტორინგს, სასამართლო ხელისუფლების დამოუკიდებლობის გაზრდას, ინდივიდუალურ მოსამართლეთა როლის გაძლიერებას, სამართალდამცავი სტრუქტურების, მათ შორის, პროკურატურის სისტემაში პროფესიონალიზმის გაზრდას, საჩივრების განხილვის დამოუკიდებელი და ეფექტური მექანიზმის შექმნას, წინა წლებში ჩადენილი ადამიანის უფლებების დარღვევის ფაქტების გამოძიებას, მათ შორის, დაზარალებულთა კომპენსაციას, ყველა სახის ძალადობის წინააღმდეგ სახელმწიფო კამპანიის წამოწყებას, მოწყვლადი ჯგუფების უფლებების დაცვის გაძლიერებას, შრომის უსაფრთხოების მონიტორინგის ინსპექციის შექმნას და სხვა.
მათივე ინფორმაციით, მნიშვნელოვანია ისიც, რომ აღნიშნული საკითხები შესულია საქართველოს სახალხო დამცველის 2013 წლის საპარლამენტო ანგარიშში და სახელმწიფოს შესაბამისი უწყებებისადმი არსებობს სახალხო დამცველის რეკომენდაციები.
სახალხო დამცველის განმარტებით, ევროკავშირის სპეციალური მრჩევლის, თომას ჰამარბერგის მოღვაწეობა საქართველოში განსაკუთრებულად მნიშვნელოვანი იყო. მისი ანგარიში საქართველო გარდამავალ პერიოდში, ისევე როგორც დასკვნითი რეკომენდაციები უნდა იყოს საქართველოს ხელისუფლების ყველა შტოსათვის სახელმძღვანელო დოკუმენტი.
ომბუდსმენი იმედოვნებს, რომ აღნიშნულ დოკუმენტებში მოყვანილი რეკომენდაციების შესრულება დღის წესრიგში საქართველოს ხელისუფლების ერთ–ერთი მთავარი საკითხი იქნება, რაც ხელს შეუწყობს კანონის უზენაესობისა და ადამიანის უფლებათა დაცვის განმტკიცებას ქვეყანაში.