ცენტრალური საარჩევნო კომისიის სპიკერი ეკა აზარაშვილი „ნიუპოსტთან“ საუბარში, გავრცელებულ ინფორმაციას იმის შესახებ, რომ საარჩევნო ფასდაკლების გამოცხადების ინიციატივა ცესკოდან წამოვიდა, კატეგორიულად უარყოფს.

„მე დღეს პირველად ვნახე ეს კლიპი და საერთოდ არ ვიცი ცესკოდან როგორ უნდა წასულიყო ეს ინფორმაცია. ამას აუცილებლად გავარკვევ. მე გეტყით, რომ ცესკო აღნიშნულს უარყოფს, რადგან მე არ ვფლობ მსგავს ინფორმაციას“,- განაცხადა „ნიუპოსტთან“ საუბარში ეკა აზრაშვილმა.

„მაკდონალდსი საქართველოს“ დირექტორმა თენგიზ კაპანაძემ „კომერსანტთან“ საუბრისას განაცხადა, რომ საარჩევნო ფასდაკლების გამოცხადების ინიციატივა ცესკოდან წამოვიდა.

როგორც „მაკდონალდსის“ დირექტორი ამბობს, ეს კომპანიისთვის წმინდა სოციალური პროექტია, ისეთი, როგორიცაა შეზღუდული შესაძლებლობების ადამიანების დასაქმება.

"ნებისმიერმა ნორმალურმა კომპანიამ უნდა მიიღოს მონაწილეობა ისეთ აქციაში, რომელიც საქართველოში არჩევნებთან დაკავშირებით ტარდება", -განაცხადა კაპანაძემ „კომერსანტთან“ საუბარში.

როგორც ცნობილია, 12 ივლისს, თვითმმართველობის არჩევნების მეორე ტურის დღეს, მარკირების წარმოდგენის შემთხვევაში, ბიზნესკომპანიები მომხმარებლებს ფასდაკლებას სთავაზობენ.

შესაბამისი სარეკლამო რგოლები სატელევიზიო სივრცეში უკვე ტრიალებს. მასში ნათქვამია, რომ "ბიზნესკომპანიები ერთიანდებიან საერთო მიზნის გარშემო" და ამომრჩევლებს მოუწოდებენ გამოცხადდენ მეორე ტურზე, გაიარონ მარკირება, დღის ბოლომდე წარადგინონ მარკირება სასურველ სავაჭრო ქსელებში და სპეციალური ფასდაკლებით ისარგებლონ.

კერძოდ, ისინი მიიღებენ 20%-იან ფასდაკლებას "მაკდონალდსა" და "ვენდისში", 22%-იან ფასდაკლებას - აფთიაქებში - PSP, "ავერსსა" და "ჯი პი სი"-ში, 15%-იან ფასდაკლებას "გუდვილსა" და "სმარტში", ასევე 5-თეთრიან ფასდაკლებას "გალფსა" და "ვისოლში".