საქართველოს პრეზიდენტმა გიორგი მარგველაშვილმა დაადასტურა, რომ უელსის სამიტზე ქართული დელეგაციის ხელმძღვანელი იქნება. ამის შესახებ, მარგველაშვილმა სამხრეთ კავკასიასა და ცენტრალურ აზიაში ნატო-ს გენერალური მდივნის სპეციალურ წარმომადგენელთან ჯეიმს აპატურაისთან შეხვედრის შემდეგ განაცხადა.

მისი განმარტებით, შეხვედრაზე საუბარი შეეხო კონკრეტულ გეგმებს, რომლიც საქართველოს უელსის სამიტთან მიმართებაში გააჩნია.

„ჩვენ გვქონდა შინაარსობრივი შეხვედრა ბატონ აპატურაისთან. მე დავუდასტურე მას, რომ უელსზე ჩვენ ვიქნებით წარმოდგენილი, ჩვენ ვისაუბრეთ იმ კონკრეტული გეგმების თაობაზე, რომელიც გვაქვს უელსის სამიტთან მიმართებაში. ეს არის უაღრესად მნიშვნელოვანი სამუშაო პროცესი, რომელიც კარგა ხნის დაწყებულია. დღეს ახალი დეტალები განვიხილეთ და ბუნებრივია, სამიტზეც ამ პროცესის გაგრძელება იქნება. მინდა კიდევ ერთხელ დაგიდასტუროთ, რომ საქართველოს პრეზიდენტი და ადმინისტრაცია, ისევე როგორც საქართველოს მთავრობა და პარლამენტი მუშაობენ საქართველოს ინტერესებიდან გამომდინარე. ამასთან ერთად, ეს არის ხელისუფლების ცალკე შტოები და ბუნებრივია, ისინი აწარმოებენ საკუთარ საქმიანობას და მუშაობენ იმ დღის წესრიგით, რომელიც დგინდება საერთაშორისო მოლაპარაკებებზე. როგორც ნატო-ს სამიტზე, ასევე გაერო-ს სამიტზეც, საქართველოს პრეზიდენტის სახით ვიქნებით წარმოდგენილი. ბიუნებრივი საქართველოს ნებისმიერი წარმომადგენელი, იმუშავებს საქართველოს ინტერესებიდან გამომდინარე“, - განაცხადა პრეზიდენტმა.