ევროპულ და ევროატლანტიკურ სტრუქტურებში ინტეგრაციის საკითხთა სახელმწიფო მინისტრი ალექსი პეტრიაშვილი ნატოს გენერალური მდივნის სპეციალურ წარმომადგენელს სამხრეთ კავკასიასა და ცენტრალურ აზიაში ჯეიმს აპატურას შეხვდა.

მხარეების შეთანხმებით, მაქსიმალური ძალისხმევა იქნება გამოჩენილი იმისთვის, რომ საქართველოსთვის მისაცემ დოკუმენტში გაკეთდეს ჩანაწერი, რომ ქვეყანა კიდევ უფრო მეტად მიუახლოვდა ნატოს წევრობას.

პეტრიაშვილმა აპატურაისთან შეხვედრის დასრულების შემდეგ განაცხადა, რომ ამაზე უნდა შეთანხმდეს ნატოს წევრი ყველა სახელმწიფო.

მისივე განცხადებით, ჯერ კონკრეტულად არ არის განსაზღვრული, რაში გამოიხატება საქართველოში ნატოს ყოფნის გაზრდა.

„ისეთი წარმომადგენლობა, როგორიც ნატოს მხრიდან საქართველოში ყოფნისთვის იგეგმება, არც ერთ სხვა ასპირანტ სახელმწიფოში არ იქნება. არ მინდა, საზოგადოებას ზედმეტი მოლოდინები შევუქმნა, მაგრამ საქართველო ამ პროცესში დაწინაურდება უელსის სამიტზე სხვა ასპირანტ ქვეყნებს შორის ნატოსკენ მიმავალ გზაზე“- აღნიშნა ალექსი პეტრიაშვილმა.