"არჩევნების მეორე ტური არის საქართველოს კიდევ ერთი ნაბიჯი დემოკრატიული განვითარებისკენ“, - ამის შესახებ "ქართული ოცნების" საარჩევნო შტაბის ხელმძღვანელმა კახა კალაძემ ოზურგეთის მოსახლეობასთან შეხვედრის დროს განაცხადა.

მისი თქმით, დღეს საარჩევნო კამპანია სრულიად განსხვავებულ რეალობაში მიმდინარეობს.

"ნებისმიერ პარტიას ჰქონდა შესაძლებლობა, რომ თავისუფალ და დემოკრატიულ გარემოში მიეწოდებინა ამომრჩეველისთვის ის პროგრამა, რომელიც მათ გააჩნდათ. თითოეული თქვენგანის დამსახურებაა, რომ არ ხორციელდება ზეწოლა და ძალადობა ხმების აღების მიზნით. ეს ყველაფერი ჩავაბარეთ ჩვენ წარსულს ერთად დგომითა და ერთსულოვნებით. 2012 წელს ყველა გავერთიანდით ერთი პიროვნების, ბიძინა ივანიშვილის ირგვლივ და დავიწყეთ ბრძოლა იმ კრიმინალური დაჯგუფების წინააღმდეგ, რომელსაც "ნაციონალური მოძრაობა" წარმოადგენდა. ეს ბრძოლა წარმატებით წარიმართა, 1 ოქტომბერს იყო ძალიან დიდი გამარჯვება, იყო მეორე რაუნდი საპრეზიდენტო არჩევნები, სადაც ჩვენმა კანდიდატმა გამარჯვებას მიაღწია და გვაქვს მესამე ძალიან მნიშვნელოვანი რაუნდი, რადგან ბრძოლა ბოლომდე არ არის მიყვანილი. დარწმუნებული ვარ 12 ივლისს ერთად ვიზეიმებთ დიდ გამარჯვებას", - განაცხადა კალაძემ.