საგარეო საქმეთა მინისტრი მაია ფანჯიკიძე პრეზიდენტის ადმინისტრაციის მიერ გუშინ გავრცელებულ ინფორმაციას ეხმაურება, რომლის თანახმად პრეზიდენტის გაერო-ში ვიზიტის შესახებ ინფორმაცია საგარეო უწყებამ გაერო-ს არ გადაუგზავნა. როგორც ფანჯიკიძე განმარტავს, არც ერთ შემთხვევაში, საგარეო საქმეთა სამინისტროს არანაირი ვიზიტის განხორციელებაში პრობლემა არ შეუქმნია.

„საგარეო უწყებამ ერთი თვის წინ მიიღო დავალება მთავრობისგან, რომ მოემზადებინა ვიზიტი გაერო-ს გენერალურ ასამბლეაზე და დაეწყო ამაზე მუშაობა. ამ მუშაობაში შედის ის, რომ პრემიერ-მინისტრი სიტყვით გამოვა გაერო-ს გენერალურ ასამბლეაზე. ექნება ორმხრივი შეხვედრები და მონაწილეობას მიიღებს რამდენიმე პარალელურ ღონისძიებაში. საქართველოს საგარეო საქმეთა სამინისტროს არასოდეს ჰქონია პრობლემა საგარეო ვიზიტებთან დაკავშირებით, იქნებოდა ეს პრეზიდენტის თუ პრემიერის დონეზე. ნებისმიერი ვიზიტი, რომელიც ჩემი მინისტრობის პერიოდში განხორციელდა, ძალიან კარგად იყო ორგანიზებული და რაიმე დაბრკოლება არც მომავალში იქნება“, - განაცხადა მაია ფანჯიკიძემ.

გუშინ პრეზიდენტის ადმინისტრაციამ გაავრცელა ინფორმაცია, რომ გიორგი მარგველაშვილი მიმდინარე წლის 23 სექტემბერს ნიუ-იორკში დაგეგმილ გაერო-ს სამიტში მიიღებს მონაწილეობას. მათივე ინფორმაციით, საგარეო საქმეთა სამინისტრომ პრეზიდენტის თანხმობის შესახებ ინფრომაციას გაერო-ს არ გადაუგზავნა.