ქართული ეროვნული ვალუტის, ლარის სიმბოლო ეროვნული ბანკის პრეზიდენტმა გიორგი ქადაგიძემ წარადგინა. მან სიმბოლოს შექმნისთვის გამარჯვებული მხატვარი მალხაზ შველიძე 2 000 ლარით დააჯილდოვა.

ეროვნული ბანკის პრეზიდენტმა ასევე გამარჯვებული კონცეფციის თანაავტორებს სერტიფიკატები გადასცა.

„რამდენიმეთვიანი მუშაობის შემდეგ, პროექტი წარმატებით დასრულდა. დღევანდელი დღიდან ლარს აქვს თავისი სიმბოლო. ეს ძალიან მნიშვნელოვანი ნაწილია ჩვენი ეროვნული ვალუტის პოპულარიზაციისთვის და შემდგომი ნდობის განმტკიცების თვალსაზრისით. დადგება ის დღე, როცა საქართველო შევა ევროკავშირში და გახდება სრულუფლებიანი წევრი და როცა უარს ვიტყვით საკუთარ ვალუტაზე, მაგრამ იქამდე, ჩვენ ყველაფერს გავაკეთებთ, რომ ეროვნული ვალუტის მიმართ ნდობა ძალიან მაღალი იყოს. აქვე მინდა ვისარგებლო შემთხვევით და გითხრათ, რომ მომავალ წელს ეროვნულ ვალუტას 20 წლის იუბილე აქვს და ამასთან დაკავშირებით ძალიან სერიოზული და მნიშვნელოვანი სიახლეები გვექნება“, - განაცხადა ქადაგიძემ.