ევროკავშირთან ასოცირების ხელმოწერასთან დაკავშირებით ამერიკაში ევროკავშირის წარმომადგენლობაში საზეიმო მიღება გაიმართა. მასზე მიწვეულნი იყვნენ საქართველოს, უკრაინის, მოლდოვის ელჩები, ასევე შეერთებული შტატების სახელმწიფო დეპარტამენტიდან ერიკ რუბინი.

შეხვედრაზე ასოცირების ხელშეკრულების მნიშვნელობასა და შეერთებული შტატების მხარდაჭერაზე გაამახვილეს ყურადღება. მიღებაზე საქართველოს ელჩმა ევროკავშირთან მიმართებით ედუარდ შევარდნაძის წვლილზეც ისაუბრა.

„საქართველოს ტერიტორიის დიდი ნაწილი მიტაცებულია ისევე როგორც ყირიმი და დნესტრისპირეთი. ეს კონფლიქტები გარეშე ძალების მიერ იყო წამოწყებული, ასოცირების შეთანხმებამ ევროკავშირს კიდევ უფრო დაგვაახლოვა. მინდ აღვნიშნო ედუარდ შევარდნაძის წვლილიც. მან დიდი როლი შეასრულა საქართველოს წარმატების ისტორიაში“, - განაცხადა არჩილ გგეშიძემ.

საქართველოს გარდაცვლილი პრეზიდენტის ღვაწლზე ერიკ რუბინმაც გააკეთა კომენტარი.

„ეს არის წარმატების ისტორია, პირველ რიგში ევროკავშირისა და მისი 28 წევრი ქვეყნისთვის. ჩვენ მივესალმებით მტკივნეული გზის გადალახვას, რომელიც ამ სამმა ქვეყანამ გაიარა ხელშეკრულების ხელმოწერისა და რათიფიკაციისთვის. მნიშვნელოვანია ის ფაქტი, რომ ასოცირების ხელშეკრულების ხელმოწერა ნებაყოფლობითი ნაბიჯია. მიუხედავად ამისა არის ფაქტები, რომლებსაც ჩვენ დღეს არ აღვნიშნავთ, ეს არის რუსეთ-ევროპის ურთიერთობებში შექმნილი პრობლემები. ჩვენ არასდროს შევეგუებით ყირიმის ნახევარკუნძულის ანექსიას. მსურს მწუხარება გამოვთქვა ედუარდ შევარდნაძის გარდაცვალების გამო“, - განაცხადა ერიკ რუბინმა.