სტრასბურგში საჩივარი სააკაშვილის ანტირუსული ისტერიის კამპანიის დროს შევიდა

სტრასბურგში საჩივარი სააკაშვილის ანტირუსული ისტერიის კამპანიის დროს შევიდა - კარასინი

პოლიტიკა - 09:57, 08 Jul, 2014

2243

რუსეთის საგარეო საქმეთა მინისტრის მოადგილე გრიგორი კარასინი სტრასბურგის სასამართლოს მიერ მიღებულ გადაწყვეტილებას ეხმაურება, რომლის მიხედვით საქართველომ რუსეთს სახელმწიფოთაშორისი დავა მოუგო. მისი თქმით, სტრასბურგის სასამართლოში რუსეთის წინააღმდეგ საჩივარი შევიდა 2007 წელს, როდესაც საქართველოში გააქტიურებული იყო ანტირუსული ისტერიის მორიგი კამპანია. კარასინის განცხადებით, მაშინდელ ხელისუფლებას აღნიშნული საჩივრით არა სამართლიანობის აღდგენა, არამედ რუსეთისთვის ზიანის მიყენება სურდა.

"საქართველოს საჩივარი სტრასბურგის სასამართლოში 2007 წლის მარტში შევიდა. საქართველოში მაშინ გააქტიურებული იყო ანტირუსული ისტერიის მორიგი კამპანია, რომელსაც მიხეილ სააკაშვილის რეჟიმი რეგულარულად ახორციელებდა. მისი მიზანი იყო გაეწყვიტა ორი ერის მეგობრობა. სასამართლოსადმი მიმართვით მაშინდელი ხელისუფლება ზრუნავდა არა სამართლიანობის აღდგენაზე, არამედ იმაზე, რომ რუსეთისთვის მაქსიმალური ზიანი მიეყენებინა. სწორედ აქედან გამომდინარე შევიდა სარჩელში უსაფუძვლო, სინამდვილესთან არანაირ კავშირში მყოფი ბრალდება, რომელიც საბოლოო ჯამში, კანონიერად უარყო სასამართლომ. იმედია, პოლიტიზირებული ანტირუსული სარჩელი და ბოლო წლებში რუსეთ-საქართველოს ურთიერთობებში მომხდარი მოვლენები გამაფრთხილებელი იქნება მათთვის, ვინც ეცდება ჩვენი ქვეყნების კეთილმეზობლური ურთიერთობების დარღვევას", – განაცხადა გრიგორი კარასინმა.