ოპოზიციური პარტიების რუსთავის მერობის ოთხი კანდიდატი ,,ნაციონალური მოძრაობის" მერობის კანდიდატს მამუკა ჩიქოვანს მხარდაჭერას უცხადებს.

ამის შესახებ ერთობლივი განცხადება დღეს რუსთავის დემოკრატიული ჩართულობის ცენტრის" ოფისში გამართულ ბრიფინგზე, ,,ჩვენი საქართველოს" რუსთავის მერობის ყოფილმა კანდიდატმა ეროსი კიწმარიშვილმა, ,,არასაპარლამენტო ოპოზიციის" კანდიდატმა ალექსანდრე ბერიძემ, ,,ნინო ბურჯანაძე -ერთიანი ოპოზიციის" კანდიდატმა კობა ძლიერიშვილმა და ,,საქართველოს პატრიოტთა ალიანსის" კანდიდატმა ივანე შათირიშვილმა, ,,ნაციონალური მოძრაობის" რუსთავის მერობის კანდიდატ მამუკა ჩიქოვანთან ერთად გააკეთეს.

მათი თქმით, არჩევნების მეორე ტურში „ნაციონალური მოძრაობის“ გამარჯვების შემთხვევაში, მასთან თანამშრომლობას გეგმავენ.

რუსთავის მერობის ყოფილმა კანდიდატებმა და „ნაციონალური მოძრაობოს“ რუსთავის მერობის კანდიდატმა სიმბოლურად ურთიერთთანამშრომლობის ხელშეკრულებასაც მოაწერეს ხელი.

,,ათასობით ამომრჩეველს, რომელმაც დამიჭირა მხარი, ვთავაზობ, რომ თუ მათ სჯეროდათ, რომ მე მოვიტანდი რუსთავში 100მილიონიან ინვესტიციას და ამის ხარჯზე შევქმნიდი 10 ათას სამუშაო ადგილს, ვიტოვებ იგივე ვალდებულებას მათ წინაშე, თუმცა ამ ვალდებულების შესასრულებლად, მე კონტრაქტს ვაფორმებ მამუკა ჩიქოვანთან. თუ ისინი მხარს „ნაციონალური მოძრაობის“ კანდიდატს დაუჭერენ, ორშაბათიდან დავიწყებთ ამ პროექტის და მათი სხვა ხედვების ერთობლივ რეალიზაციას," - განაცხადა ეროსი კიწმარიშვილმა.