დავით დარხველიძე სტამბულში გაემგზავრა

პოლიტიკა - 14:09, 07 Jul, 2014

626

დევნილთა მინისტრი დავით დარახველიძე და მინისტრის მოადგილე ნინო ჭავჭავაძე სტამბოლში აფხაზეთის დე ფაქტო მთავრობის წარმომადგენლებს შეხვდებიან.

ვიზიტის მიზანი აფხაზეთის კონფლიქტის დროს, უგზო-უკვლოდ დაკარგული ქართველი გმირების გადმოსვენების პროცესის დაჩქარებაა.
დევნილთა და განსახლების მინისტრის განცხადებით, მოლაპარაკების შედეგად უკვე მოხერხდა "ბაბუშერას" აეროპორტში თვითმფრინავის ჩამოგდებისას დაღუპული გმირების ცხედრების თბილისში ჩამოსვენება და დიღმის სასაფლაოზე სამარხების გახსნა, სადაც სავარაუდოდ აფხაზები არიან დასაფლავებული.
„გრძელდება ქართულ-აფხაზური დიალოგი და თანამშრომლობა კონფლიქტის დროს უგზო-უკვლოდ დაკარგულთა მოძიების საკითხებზე. ეს პროცესი მიმდინარეობს წითელი ჯვრის ეგიდით. შედეგები საზოგადოებისთვის ცნობილია, სულ ცოტა ხნის წინ დასრულდა ბაბუშერას ძმათა სასაფლაოდან ჩვენი თანამემამულე გმირების გადმოსვენების პროცესი. ასევე დასრულდა დიღმის სასაფლაოზე სამარხების გახსნა. მიმდინარეობს საექსპერტო სამუშაოები, რის შემდეგაც ცხედრები ოჯახებს გადაეცემათ. უახლოეს სამ დღეში არის მორიგი შეხვედრები, რომლის შედეგებზე დაბრუნების შემდგომ მოგახსენებთ. ქართული მხარის პოზიცია მდგომარეობს იმაში, რომ დავაჩქაროთ პროცესი. პრემიერ-მინისტრის ირაკლი ღარიბაშვილის დამოკიდებულებაა, რომ ჩვენ ფინანსურად გავიღოთ სახსრები მოვლენების დაჩქარებისათვის, რადგან ეს პრობლემა ისედაც დიდი ხანია გრძელდება“, - აღნიშნა დარახველიძემ.
ვიზიტი სამი დღის განმავლობაში გაგრძელდება.