„თიანეთში ნინო ბურჯანაძე მთლიანად ვანო მერაბიშვილის და "ნაციონალური მოძრაობის" ხალხს ეყრდნობა", - ამის შესახებ უმრავლესობის წევრმა, თიანეთის მაჟორიტარმა დეპუტატმა ზაქარია ქუცნაშვილმა განაცხადა. ქუცნაშვილმა ჟურნალისტებს ვიდეო ჩანაწერი და ფოტო წარუდგინა, სადაც მისი თქმით ასახულია, რომ თიანეთის მუნიციპალიტეტში ნინო ბურჯანაძის წარმომადგენლები ვანო მერაბიშვილის და "ნაციონალური მოძრაობის" ხალხია. კადრებში, რომელიც 2012 წელს არის გადაღებული, ვანო მერაბიშვილის გვერდით "ნინო ბურჯანაძე - ერთიანი ოპოზიციის" გამგებლობის კანდიდატი ილია არჩემაშვილი დგას.

ქუცნაშვილის ინფორმაციით, თიანეთის საკრებულოში "ნინო ბურჯანაძე - ერთიანი ოპოზიციის" საკრებულოს წევრობის ხუთეულში, სამი "ნაციონალური მოძრაობის" წევრები არიან.

"ა, ბატონო, ვიდეო ჩანაწერი და ა, ბატონო, ნომერი "ხუთიანი". თუ ვინმეს ამის დანახვა არ უნდა, არ დაინახოს. ფაქტია, რომ "ნინო ბურჯანაძე - ერთიანი ოპოზიციის" ხალხი თიანეთში არიან "ნაციონალური მოძრაობის" და ვანო მერაბიშვილის ხალხი. თიანეთში ბავშმაც კი იცის, რომ ვანო მერაბიშვილის ბიჭები ნინო ბურჯანაძის ხალხი გახდა. აქედან გამომდინარე, გეკითებიხთ, რამდენად გამართლებულია, რომ 26 მაისის შემდეგ, ნინო ბურჯანაძის შტაბი იმ ხალხს ეყრდნობოდეს ვინც ვანო მერაბიშვილს და "ნაციონალურ მოძრაობას" წარმოადგენდა?", - განაცხადა ზაქარია ქუცნაშვილმა.