ექსპერტი კახა კახიშვილი ქვეყანაში ბოლო პერიოდში განვითარებულ მოვლენებს აფასებს. კახიშვილი „კვირის პალიტრასთან“ საუბრისას აცხადებს, რომ „ერთიან ნაციონალურ მოძრაობას“ ხელისუფლების სათავეში დაბრუნება არეულობის გზით აქვს გადაწყვეტილი, ხელისუფლებამ კი დიდი ყურადღება უნდა გამოიჩინოს:

„იმან, რაც საქალქო სასამრთლოსთან მოხდა, კიდევ ერთხელ ცხადყო, რომ „ნაციონალური მოძრაობა“ არის ის ძალა, რომელიც უარს არ იტყვის არც არეულობაზე, არც პროცესების ესკალაციასა და არც ძალადობაზე. ამ პარტიის წევრები მუდმივად აპროტესტებენ ძალადობას, თუ ეს მათ წევრებს ეხება, იმავდროულად. თვითონ არ ეშვებიან ამგვარ ქმედებებს. ამ არეულობამ ცხადყო, რომ „ნაციონალური მოძრაობისთვის“ არც სასამართლოს უზენაესობა ნიშნავს რამეს და არც პროკურატურა, როდესაც ისინი მათთვის არახელსაყრელ გადაწყვეტილებას იღებენ. „ნაციონალური მოძრაობის“ მმართველობისას ვინმეს რომ გაებედა და სასამართლოსთვის ან პროკურორისთვის ასეთი შეურაცხყოფა მიეყენებინა, სისხლში აბანავებდნენ!

„ნაციონალთა“ ერთი ნაწილი ვითარების ესკალაციას შეეცადა, თან ამას ისე წარმოაჩენენ, ვითომ თვითონ არიან მსხვერპლნი. „ნაციონალური მოძრაობის“ ახალგაზრდული ფრთა სახელმწიფო ინსტიტუტებისა და ხელისუფლების წარმომადგენელთა დისკრედიტაციას დაიწყებს.

„ნაციონალებს“ ესკალაციის კონკრეტული გეგმა აქვთ. ამას ხელს შეუწყობს „ნაციონალების“ კონტროლირებადი საინფორმაციო საშუალებები. აამუშავებენ ყველა იმ ბერკეტს, რაც სხვადასხვა უწყებასა და ორგანიზაციაში კიდევ შერჩათ, მაგალითად თელასსა და ამგვარ კომპანიებში შეიძლება საბოტაჟიც კი სცადონ. ეს გეგმა ნამდვილად აქვთ, მოახერხებენ თუ არა მის ამუშავებას, დამოკიდებული იქნება ხელისუფლების კვალიფიციურობაზე, მოვლენების ადეკვატურად გაანალიზებასა და სწორი გადაწყვეტილების მიღების უნარზე.

„ნაციონალებს“ არეულობის გზით აქვთ გადაწყვეტილი ხელისუფლებაში დაბრუნება, თან მათი მიზნები საკმაოდ მრავალ წელზეა გაწერილი. ხელისუფლებას მეტი სიფრთხილე მართებს, რაც მეტ შეცდომას დაუშვებს მმართველი ძალა, მით უფრო გაძლიერდება „ნაციონალური მოძრაობა“, - აცხადებს კახიშვილი „კვირის პალიტრასთან“ საუბრისას.